Cobra lusot sa Magnolia

MANILA, Philippines – Kinumpleto ni Paul Lee ang natatanging four-point play sa krusiyal na bahagi ng laban upang tulungan ang Cobra Energy na igupo ang Magnolia Purewater, 74-67 sa Game 1 ng kanilang quarterfinal series sa PBL PG Flex Unity Cup na ginanap sa Ynares Sports Arena sa Pasig.

Nalimita sa tatlong puntos sa unang dalawang quarter, nagpasabog ang 5’11 na si Lee ng 15 puntos sa pinal na bahagi ng labanan, kabilang na ang siyam sa payoff period para makumpleto ang pagba-ngon ng koponan.

Naghahabol sa 51-57 sa pagtatapos ng ikatlong yugto, nagbagsak ng 11-0 ang Energy Warriors na tinampukan ng four-point play ni Lee at isa pang tres ni James Martinez ang naglagay sa Cobra sa unang 67-62.

Ang kabayanihan ni Lee ay kinumpleto ng steal ni Eder Saldua para iselyo ang panalo sa 71-64 may ilang tikada na lang ang nalalabi.

Maaaring makuha ng Cobra ang ikaapat at hu-ling semifinals berth kung mananalo sila sa Martes.

Samantala, para makumpleto ang grand sweep ng Nokia National Basketball Training Center (NBTC)D-League, matagumpay na naigupo ng Smart Sport-Manila ang maliliit na Davaoeño, 101-60.

Ang panalong ito ay ang ika-13th straigth win ng Manila mula sa NCR Elims ng torneong suportado ng Nokia Philippines at TAO Corporation sa ilalim ng pamunuan ng Samahang Basketbol ng Pilipinas sa pangangasiwa ni Manny Pangilinan. (Sarie Nerine Francisco)