Kanhi world champ kontra ni Banal

CEBU, Philippines – Kanhi world champion ang mosugat ni AJ ‘Bazooka’ Banal sa iyang pagbalik og katkat sa ring.

Human sa iyang kapildihan pinaagi sa 10th round stoppage ngadto ni Rafael Concepcion sa ilang WBA Interim superflyweight title match niadtong Hulyo 26 sa miaging tuig, gipamatud-an ni Banal nga andam na kini nga mokatkat sa ring dihang iyang gipaundang ang Indonesian champion nga si Nouldy Manakane sa ikaupat nga round niadtong Enero 31 didto sa Tagbilaran City.

Ang 20-anyos nga si Banal gitahasan na sab nga moharong og laing lig-on nga kontra nga si Mbwana ‘African Golden Boy’ Matumla sa laing eksplosibong binakbakay nga gipasiugdahan sa ALA Promotions ug sa higanteng broadcast network ABS/CBN karong Mayo 16 diha sa Cebu Coliseum.

Si Matumla, kanhi IBO world super flyweight champion, WBA Pan-African super flyweight champion, kanhi WBA Intercontinental super flyweight champion ug kanhi PanAsian Boxing Association (PABA) 115 lbs. champion ang manulong sa Sugbu aron sukdon ang abilidad ni Banal.

Sa undercard, laing mokatkat og balik sa ring nga si Czar Amonsot sa ALA Boxing mopakita sa iyang abilidad sa ikaduhang higayon human niya gidemolis ang Indonesian nga si Zoel Fidal sa 5th round sa dihang iyang harungon si Morris ‘Virus’ Chule sa Kenya, kinsa nagbitbig og 11-6-2, 8KOs.

Si Chule bag-o lang mi-TKO nilang Musa Njure ug Oamari Ramadan.

Sa opening salvo sa triple main event, si Jason Pagara makigsinukliay og kumo batok ni Indonesian champion Hero Katili, kinsa nakaaway na dinhi sa Sugbu batok ni Doo-Suk Oh sa Korea niadtong Agosto 30, 2007 diha sa Waterfront Cebu City Hotel.

Ang mga tiket mapalit sa tag P500 alang sa ringside, P300 sa lower box, P150 sa upper box ug P50 alang sa general admission. – BANAT NEWS