CEBU, Philippines - Sa wala pa ang impresibong pagpukan ni Manny “Pacman” Pacquiao ngadto sa British brawler nga si Ricky “Hitman” Hatton, ang featherweight prospect nga si Bernabe “Abe” Concepcion unang nihatag og dungog sa nasud dihang mipatigbabaw siya iyang away batok ni Yogli Herrera sa undercard sa “Battle of East and West” didto sa MGM Grand sa Las Vegas.
Si Concepcion kinsa nakauban ni Pacquiao sa training didto sa Wild Card Gym sa Los Angeles, mipakita sa iyang abilidad dihang iyang gipasulod ang iyang mga kinumo ngadto sa lawas ug ulo sa Columbian.
Human sa unom ka round nga binukbukay ang tulo ka mga hurado nga sila si Duane Ford, Richard Houck ug Robert Hoyle miiskor og 60-54 pabor ngadto sa Pinoy fighter.
Tungod sa maong kadaugan si Concepcion misaka ngadto sa 29-1-1, 18KOs, samtang si Herrera nikanaug ngadto sa 22-8 win-loss card.
Ang 21-anyos nga si Concepcion gikatakda untang mo-away batok ni WBO featherweight king Steven Luevano apan wala kini mahinayon dihang na-injury si Luevano atol sa iyang training. - Lemuel P. Maglinte (BANAT NEWS)