Cyber Knights naka-eskapo

CEBU, Philippines – Nakalingkawas ang Asia College of Technology (ACT) Cyber Knights ni coach Tata Merced sa kulbahinam nga duwa batok sa Chazyl Mae pinaagi sa paglansang og 63-60 nga kadaugan sa nagpadayong aksiyon sa 1st M. Lhuillier Kwarta Padala Cup basketball tournament niadtong Sabado didto sa Tabunok Sports Complex sa dakbayan sa Talisay.

Nagtusak-tusak ang mga puntos sa Cyber Knights pagsugod sa duwa ug miposte og singko puntos nga labaw, 19-14 paghuman sa unang kuwarter. Ang Cyber Knights padayong mipakita sa ilang kamangtas sa sunod nga kuwarter aron inaton ang labaw ngadto na sa 12 puntos sa halftime, 38-26.

Ang Chazyl Mae ni coach Mark Tallo milusad og 16-8 sa third quarter luyo sa mga paningkamot nilang Michael Luga ug Milfred Sampelo nga nakapahiyos sa labaw, 42-46, apan ang Cyber Knights wala magpahulga ug padayon kining nakigbatok aron maangkon ang kadaugan.

Sa maong kadaugan, ang Cyber Knights nagsolo na karon sa ikaduha sa overall standings nga nagbitbit og 3-1 win-loss record, samtang ang Chazyl Mae nagtangag og 3-2 nga baraha.

Sa pasiunang duwa, ang San Remigio Beach Club (SRBC) nidaog pinaagi sa default batok sa 24/7 Convenience Store.

Ang torneyo nga gipasiugdahan sa M. Lhuillier pinaagi sa ilang marketing director Michael 'Mike' Roma migahin og P100,000 nga ganting salapi diin ang kampiyon mobulsa og P50,000, ang second placer makadawat og P30,000 ug ang third placer makaangkon og P15,000.

 Puntos Matag Usa

ACT (63) - Pontemayor 17, Cadiz 11, Nuñez 9, Reyes 9, Batiancila 6, Doy 6, Montes 3, Valencia 2

Chazyl Mae (60) - Luga 17, Sampelo 12, Toring 10, Caputolan 9, Resilla 9, Llaguno 2, Torion 1  - BANAT NEWS