Lamacan midaog sa Lovers Hill

CEBU, Philippines – Mipatigbabaw gihapon ang Tulic-Lamacan Sky Crossers bisan nahanaw ang ilang 21 puntos nga labaw dihang ilang gipulbos ang Lovers Hill pinaagi sa overtime, 104-101 sa Inter-Zonal category sa Mayor Edsel Galeos Cup didto sa President Diosdado Macapagal Sports and Cultural Center sa lungsod sa Argao, Cebu.

Human makalabaw og 21 puntos sa third quarter, ang Lovers Hill mipahungaw sa ilang kainit sa katapusang kuwarter aron pagpapas sa labaw ug gani nilabaw pa kini sa labing unang higayon, 90-88 human sa free throws ni Epoy Remolino. Apan dali nga gitabla ni Mark Goc-ong ang iskor, 90-all human sab sa iyang kaugalingong gift shots sa nahabiling 25 segundos sa regulasyon nga miresulta ngadto sa overtime.

Sa overtime, ang Lamacan mao na ang nagdala sa duwa hangtod na sa pagkapupos sa oras.

Gumikan niini, ang Lamacan nakig-uban sa Simple Minds ug Poblacion-C sa kinatas-ang dapit sa liderato sa managsamang 2-0 win-loss records.

Si Goc-ong maoy nangulo sa Lamacan sa iyang 24 puntos, gisundan ni Dwight Chavez sa iyang 16 puntos ug Eloy Davis nga adunay 15 puntos.

Ang pilderong Lovers Hill gipangulohan ni Carlo delos Reyes nga mitimang og 25 puntos.

Sa laing duwa sa Inter-Zonal category, ang Buttagui team walay kukaluoy nga milubong sa Cavaliers sa iskor nga 110-63, samtang sa bugtong sangka sa Inter-town, ang Oslob nakarekober human sa ilang kapildihan pinaagi sa pagpilde sa Sibonga sa iskor nga 105-96.

Ang kanhi UC Webmaster nga si Diodato Lunday maoy nangulo sa Oslob nga miburak og 34 puntos, samtang si Niño Alima, kinsa mibahog og 23 puntos mao sab ang nangulo sa Sibonga.

Puntos Matag Usa

Unang duwa:

Lamacan (104) - Goc-ong 24, Chavez 16, Davis 15, T. Sarmago 11, Comaling 8, Mier 8, Sequilon 6, Sarillana 6, Panerio 4, M. Sarmago 4, Nasataya 2
Lovers Hill (101) - Delos Reyes 25, R. Remolino 11, C. Remolino 11, J. Remolino 10, Davis 10, Antiporta 8, Delos Reyes 6, Albofera 6, E. Remolino 4, J. Mier 4, P. Mier 4, Llegunas 2

Ikaduhang duwa:

Oslob (105) - Lunday 34, Benologa 15, Laping 12, Soriano 12, Lastimosa 11, Delasalde 10, Mirasol 7, Abines 2, Singson 2

Sibonga (96) - N. Alima 23, Olivar 15, Ledesma 12, Padilla 10, J. Alegrado 6. Limbaga 6, S. Alegrado 5, Banogon 5, C. Alima 4, Agadier 4, Gandiongco 3, Maravilles 3 – BANAT NEWS