Quirol naghari sa 3rd leg sa Atan Guardo moto-x

CEBU, Philippines – Mikudlit si Ryan Quirol og duha ka sunod-sunod nga kadaugan human niya gidominar ang expert division sa 3rd leg sa Atan Guardo Motocross Cup niadtong Domingo didto sa Brgy. Bonbon, ning dakbayan.

Susama sab nga kategoriya ang gidag-an ni Quirol sa miaging leg nga didto gipahigayon sa Brgy. Babag.

Si Ricky Coca mipahiluna sa ikaduhang dapit, samtang si Cyrel Balili nalandig sa ikatulong puwesto.

Lain pang nagmaya mao si Brian Bontuyan sa paghakot niini og duha ka korona sa beginners ug open enduro class.

Si Alex Macho mitapos sa ikaduhang dapit sa beginners ug gisundan ni Dennis Caballero, samtang si Regan Cabuena maoy ikaduha sa open enduro ug gisundan ni Cris Micobo.

Nakabawi sab dayon hinuon si Micobo gumikan kay siya man maoy nanghawod sa executive division. Ang nagsunod nga duha ka puwesto gisakmit nilang Macho ug Brian Cadutdot.

Sa Pantra A, si Jok-Jok Laborte maoy milangkat sa titulo, samtang sila si Brian Grahe ug Perning Billones maoy mitapos sa ikaduha ug ikatulong dapit.

Ang nag-unang tulo ka mananaog sa Pantra B ning torneyo nga gipasiugdahan ni Atan Guardo mao sila si Malbert Rama, Jay-R Gualiza ug Resty Morello.

Gitukod nilang Arnel Bacalso ug Eugene Gabito, ang usa ka adlaw nga lumba gipaluyohan sab sa Uniherb Philippines, usa sa nag-unang health companies sa nasud nga maoy tiggama sa sikat nga food supplements sama sa Arthro, Heartvit, Diabet, Athan, Kidneycare ug Eyeberry.

Mi-abag sab sa kalampusan niini mao sila si Dondon Guardo ug Brgy. Tisa top councilor Hon. Jeson L. Guardo.  – BANAT NEWS