2nd San Remigio Beach Volley sugdan na

CEBU, Philippines – Pipila sa mga dekalibreng atleta sa beach volley dinhi sa Sugbu ang mopakita'g aksiyon sa 2nd San Remigio Beach Volley Open nga sugdan karong adlawa didto sa San Remigio sa amihanang bahin sa Sugbu.

Ang duha ka adlaw nga kompetisyon salmotan sa 10 ka teams gikan sa nagkalain-laing universities, commercial establishments ug municipality.

Si Janez Armie Igot, kinsa nidaog sa titulo sa miaging tuig uban ni Jusabelle Brillo, naglaum nga moposte sa ikaduhang daog, apan lisud ang misyon nga iyang sagubangon kay bag-o man siya og katimbang nga si Che-Che Bohol ubos sa Team Janche.

Ilang harungon ang lig-on sab nga kontra nga sila si Florian Gutierrez ug Marites Natad sa Dilanara Marketing Technical Services. Sila si Gutierrez ug Natad maoy pambato sa Southwestern University (SWU) nga nidaog og back-to-back champions sa prestihiyosong Nestea Beach Volley National Championships niadtong 2003 ug 2004 didto sa isla sa Boracay.

Lain pang lig-ong title contenders naglakip sa reigning CESAFI beach volley champs Danika Yolanda Gendrauli ug Lorie Mae Layno sa SWU ug ang bugtong Cebu national qualifier alang sa Nestea Fit Beach Volley Season 13, Erika Camille Verano ug Apple Saraum sa University of Southern Philippines Foundation (USPF).

Uban pa nga koponan nga adunay daku'g purohan nga modaog sa titulo mao ang University of San Carlos (USC) nilang Jerymie Montalvo ug Chona Gesulga ug ang tandem nilang Mary Joy Bonita ug Rachel Hanna Singson sa University of San Jose-Recoletos (USJ-R).

Mokompleto sa mga partisipante mao sila si Kennette Garces ug Marissa Lagancia sa Team BV Addicz, Jessica Avila ug Wella Malbat sa Team X Var, Ma. Janica Jimenez ug Danilyn Lequigan sa Team Grande ug Cebu Volleyball Association (CEVA) Invitational beach volley titlist Danalie Baquiro ug Luilyn Paciño alang sa Santa Fe.

Ganting salapi ug tropeyo ang madawat sa top performers teams, samtang ang non-winners makadawat og consolation prizes. – BANAT NEWS