CEBU, Philippines – Padayong nagmangtas ang Heartfelt squad ug pabiling walay pilde human maka-ipsot batok sa Rollyr Boyz ni kapitan Rolly Diorico sa usa ka kulbahinam nga duwa, 98-95 sa nagpadayong F. Llamas Youth Association (FYA) 1st Vice Mayor Mike Rama Cup didto sa Vicente Sotto Memorial Gym sa barangay Punta Princesa, ning dakbayan.
Sa sayo pa, ang Criminal Intelligence and Investigation Bureau (CIIB) mihirit og daog pinaagi sa paglubong sa Team Grandeur sa iskor nga 99-82 aron pagdiga og 2-1 nga baraha.
Ang Heartfelt (3-0) nga nag-solo karon sa liderato gipangulohan ni Tata Laborte kinsa miposa og 32 puntos.
Ang Rollyr Boyz nga nakatilaw sa ilang labing unang pilde gipangulohan sab ni Daniel Enriquez nga mibahog og 25 puntos, gisundan nilang Eking Marata ug Chissar Llagunas nga miamot og 20 puntos matag usa. Ang Rollyr Boyz nagbitbit karon og 2-1 nga baraha uban sa CIIB.
Sa laing bahin, si Roy Veloso mi-iskor og 23 puntos aron pangulohan ang CIIB, samtang laing tulo niya ka kauban mitampo og 13 puntos matag usa.
Ang walay daug nga Grandeur gipangulohan ni Rovel Tabar ug Dondon Cadungog. Si Tabar mihipos og 21 puntos, samtang si Cadungog mikimada og 20 puntos alang sa Grandeur nga wala pa makatilaw og daog sud sa tulo ka duwa.
Ang FYA gipaluyohan ni barangay councilor Ray Gabriel Salgado ug ni tournament chairman Boy Atillo.
PUNTOS MATAG USA
Unang duwa:
CIIB (99) - Veloso 23, Maglinte 13, Capangpangan 13, Plasus 13, Bugtai 12, Dignos 6, Aldemita 6, Ylanan 4, Maucesa 3
Grandeur (82) - Tabar 21, Cadungog 20, Dacayana 11, Neutel 10, Lañohan 6, Navaja 4, Sabalande 4, Medalle 2
Ikaduhang duwa:
Heartfelt (98) - T. Laborte 32, Danding 23, Lumapguid 12, Abella 6, Cabigas 4, Basubas 4, Alob 4, Arreglo 2
Rollyr Boyz (95) - D. Enriquez 25, Marata 20, Llegunas 20, Basalo 10, Caballero 9, Lantaca 5, Dela Cerna 4, Enriquez 2 – THE FREEMAN