CEBU, Philippines – Gisugdan sa Quiapo Compound ang ilang kampanya alang sa korona pinaagi sa paglansang og 62-58 nga kadaugan batok sa Kawayanan sa Barkadahan Inter-sitio basketball tournament didto sa Riverside open court sa barangay Poblacion Oriental, Consolacion.
Ang Quiapo squad nakasugat og dili basta-basta nga kumbati sa Kawayanan sa tibuok duwa, apan ilang nakontrolar ang momentum sa duwa paingon na sa katapusang gutlo sa duwa aron pagposte og kuwatro puntos nga kadaugan.
Sila si Kerby Alinsug ug Rey Tuburan maoy topscorer sa Quiapo Compound nga mikandos og 15 puntos matag usa. Samtang ang pilderong Kawayanan gipangulohan sab ni Mikmik Semblante, sa iyang game-high 15 puntos.
Ang torneyo nga gipadagan ni commissioner Baste Alivio, gipaluyohan sa Poblacion Oriental Barangay Council ubos sa liderato ni Barangay Captain Melquides Caylan.
Gipasiugdahan kini ni Barangay Councilor Paul Alelu Q. Flores, ang kanhi sinaligan sa Far Eastern University (FEU) Tamaraws sa UAAP.
PUNTOS MATAG USA
Quiapo Compound (62) - Alinsug 15, R. Tuburan 15, Quiapo 10, Jay-R 5, P. Tuburan 5, Lada 5, Jundams 4, Normandia 3
Kawayanan (58) - M. Semblante 15, Diyom 15, Titon 7, O. Semblante 6, T. Semblante 6, C. Semblante 5, R. Semblante 4 - BANAT NEWS