Central Visayas mirampa sa Dancesport event

CEBU, Philippines – Ang Central Visayas squad nidominar sa dancesport event apan walay kuwenta ang bulawan nga ilang nahakot kay dili man kini regular sport sa Palarong Pambansa, nga pormal nga gibuksan kagahapon didto sa Leyte Sports Development Center sa Tacloban City.

Nag-una karon ang Western Visayas nga mitigom og upat ka golds ug duha ka bronzes gikan sa athletics competition sa secondary level. Nagsunod kanila ang Region XII nga adunay duha ka golds ug duha ka silvers gikan sa arnis, samtang ang Region I adunay usa ka gold nga igo na alang kanila pagpahiluna sa ikatulo nga dapit.

Sa elementary level, ang Region III ug Region XII nag-uban sa kinatas-ang dapit nga adunay usa ka gold ug usa sab ka silver matag usa, samtang ang CVIRAA ug Region 4-A mi-okupar sa ikaduha nga dapit nga adunay tag-usa ka gold. Mikapyot sa ikatulo ang Region VI nga adunay usa ka silver ug usa ka bronze.

Ang Central Visayas nakapahugyaw sa mga tawo didto sa Leyte dihang ang University of Southern Philippines Foundation (USPF) dance athletes miharos sa tanang golds.

Ang tandem nilang Jan Kristoffer Rodis ug Ellise Marie Kathleen Plaza naghari sa modern standard, samtang ang tandem nilang Lloyd Belingan ug Justhel Tabanag sa latin action.

Sama sa miaging tuig, ang dancesport usa lang ka demonstration sport event.

Ang Sugbuanang si Gia Bucag mao lang ang bugtong lehitimong nakakuha og bulawan alang sa CVIRAA sa pagka karon.

Sa laing bahin, si Kit Ceron maoy miluwas sa CVIRAA boxing team sa unang adlaw sa aksiyon pinaagi sa 19-2 nga kadaugan batok ni Federico Talnay Jr. sa Region I.

Si Kenneth Gentallan napukan ngadto ni Michael Bahina sa Region XI, 8-16 sa antweight division, samtang si Brandon Tabanes gipukan ni Ryn Bajada, 12-8 sa pinweight division ug si Lorenz Romarate napukan ngadto ni Angelo Marcial 7-31 sa lightweight division.

Hinuon, ang CVIRAA table tennis squad miposte og 3-1 nga kadaugan batok sa Region XII sa elementary boys ug 3-2 nga kadaugan batok sa CAVRAA ug 3-1 nga kadaugan batok sa Region V sa secondary boys division. – BANAT NEWS