CEBU, Philippines – Giharos sa Ave Maria Sanctuary Park-USJR Jaguars ang ilang tulo ka duwa sa elimination round human ilang gipakaging ang Asian College of Technology (ACT) Cyber Knights sa 1st Vice Mayor Rudy Espinosa Cup didto sa Barba Sports Complex sa Toledo City.
Ang Ave Maria, kinsa maoy topseed sa Group-A sa ilang 3-0 nga baraha miabante sa crossover semifinals. Ilang sangkaon ang Group-B leader CCC-CSD Builders o di ba ang Southwestern University (SWU) Cobras depende sa resulta sa mosunod nilang duwa.
Si Armand Ponce mipupo og 20 puntos ug si Michael Luga miani og 19 puntos alang sa Ave Maria, kinsa bag-o lang nakampiyon didto sa Buanoy, Balamban..
Ang pilderong Cyber Knights gipangulohan ni Dondon Nuñez pinaagi sa iyang 18 puntos, gisundan ni Cyril Pontemayor nga adunay 15 puntos. Ang Cyber Knights nagbitbit karon og 1-1 nga baraha ug gikatakdang modaog pinaagi sa default batok sa Best Buy, kinsa mi-atras sa torneyo tungod sa kakulang og players.
Sa sayo pa, ang TSBA five midaog pinaagi lang sa uno punto batok sa Blank Blue sa iskor nga 100-99 sa Inter-ballclub division.
PUNTOS MATAG USA
Ave Maria-USJR (80) -Ponce 20, Luga 19, Antigua 12, Hatague 9, Gabas 9, Latoza 4, Lapiz 3, Senining 2, Desuyo 2
ACT (69) - Nuñez 18, Pontemayor 15, Batiancila 12, Montes 8, Valencia 8, Cadiz 6, Doy 2 - Gabby G. Malagar (BANAT NEWS)