Batawang gipatumba ni Dapundong

CEBU, Philippines - Gihubuan sa 23-anyos nga si Edrin “The Sting” Dapundong ang veteran world title campaigner Bert Batawang sa iyang World Boxing Organization (WBO) Oriental Junior Flyweight belt sa ilang away niadtong miaging adlaw sa “Thriller in April” didto sa Cebu City Coliseum.

Ang Braveheart Boxer nipahaguros sa iyang mga kinumo ngadto sa lawas ug ulo sa 36-anyos nga si Batawang nga miresulta sa pagkatumba sa Sugbuanon sa makaduha ka higayun sa ilang 12-rounder bout.

Si Batawang mao ang inilog sa maong away dala ang record nga 40-6, 34KOs, wala makaarte batok sa taga-North Cotabato nga si Dapundong kinsa maisugong niharong sa beteranong boksidor ibabaw sa ring.

Unang gipatumba ni Dapundong si Batawang sa fifth round dihang nadakpan niya kini sa iyang makusog nga right straight nga gisundan og left hook. Atol sa ikapitong hugna, usa ka uppercut-left-cross combination ang gipaigo ni Dapundong sa ulo ni Batawang nga maoy nitapos sa away.

Si Dapundong nisaka karon sa record nga 21-2, 17 KOs ug mao karon ang ikatulong Braveheart Boxing ni Vice Gov. Manny Piñol sa North Cotabato nga nakasakmit og regional title.

Sa main event, nilampos si WBO Oriental Bantamweight Interim Champion Rolando Magbanua sa pagdepensa sa iyang bakus dihang iyang gipayaka ang Thai nga si Wan Sithsaithong sa 3rd round sa kaugalingon nilang 12-round bout.

Si Magbanua kinsa gitawag nga “Smooth Operator” tungod sa iyang ngilngig nga istilo sa pagpamuksing, nipahagsa sa usa ka makabungog nga right hook ngadto sa apapangig sa Thai challenger nga mipalup-og niini ibabaw sa ring.

Sa undercard bout, laing Braveheart Boxer nga si Richard Betos mipatumba sa undefeated South Korean sensation Jong Hwa Lee sa eight round, si Lorenzo “Thunderbolt” Villanueva mi-knockout sa taga-Thailand nga si Viratnoi Sithsoey sa round three.

Si Miniflyweight Rommel “Little Assassin” Asenjo nanginahanglan lang og 34 segundos aron mapatumba si W.Sithsoey sa Thailand, samtang ang flyweight nga si Jermie Jabel nipatumba usab sa taga-Cebu nga si Rey Villar sa sixth rounds. – BANAT NEWS