Oslob nagsolo sa liderato sa Galeos Cup

CEBU, Philippines – Nakalingkawas ang Oslob sa ilang kulbahinam nga duwa batok sa Boljoon pinaagi sa pagposte og 96-92 nga kadaugan ug aron sab pag-solo sa liderato sa Inter-Town division sa nagpadayong Mayor Edsel Galeos Cup summer basketball tournament niadtong Miyerkules didto sa Pres. Diosdado Macapagal Sports and Cultural Center sa Argao, Cebu.

Sayo kaayong nanginit ang duha ka kampo nga nagpuli-puli’g ilog sa labaw ug nagtabla kini sa 11 ka higayon, hangtod nga si At-at Ranolo mi-iskor pinaagi sa usa ka drive sa katapusang 25 segundos sa duwa nga maoy nakapalabaw sa Oslob, 94-92.   Ang duha ka free throws ni Dikong Laping maoy mikandado sa kadaugan.

Si Ranolo maoy nangulo sa Oslob pinaagi sa iyang 33 points, gisundan ni John Lastimosa nga adunay 23 puntos ug Momoy Abines nga miamot og 16 puntos.

Ang Oslob nagbitbit na karon og 2-0 win-loss record, samtang ang Boljoon nga gipangulohan ni Resty

Getubig adunay 1-1 nga baraha.

Si Getubig mibahog og 24 puntos, samtang si   Gilbert Andujar midonar og 15 puntos.

Sa laing duwa, gi-ihaw   sa Simple Minds ang Upland Tigers sa iskor nga 96-71 aron sab pagposte og 2-0 nga baraha.

Si Marvin Lim maoy nangulo sa Simple Minds sa iyang 20 puntos, gisundan ni Jonel Parantar nga miamot og 14 puntos.

Ang Upland Tigers gipangulohan ni Chris Rellin kinsa mihipos og 19 puntos, samtang si James Jovera miposte og 15 puntos.

Ang Poblacion-C nga gipaluyohan sa Petron, naka-ikyas bitbit ang 82-81 nga kadaugan batok sa Firebulls.

Si Leo Matarlo maoy nangulo sa Poblacion-C nga mibugha og 25 puntos, samtang si Ronnie Salazar miburak og 20 puntos aron pangulohan ang pilderong Firebulls.

PUNTOS MATAG USA

Oslob (96) - Ranolo 33, Lastimosa 23, Abines 16, Soariano 7, E. Laping 4, Singson 4, Benologa 4, D. Laping 3, Mirasol 2,
Boljoon (92) - Getubig 24, Andujar 15, Sesaldo 14, Alibango 12, Nicanor 8, Medida 8, K. Getubig 3, Antiporta 3, Tanato 2, Estella 2, Binagatan 1 – BANAT NEWS