CEBU, Philippines – Nalagpot sa ikatulo nga dapit ang PRISAA-7 sa 2009 Private Schools Athletic Association (PRISAA) National Games didto sa Naga City.
Ang perennial champion National Capital Region (NCR) midaog og laing kampiyonato sa National Games. Mi-okupar sa ikatulo ang Western Visayas.
Nakadaginot pa og duha ka medalya ang Cebu sa katapusang adlaw sa kompetisyon kortesiya nilang Glenn Nayre ug Jay Impuesto, kinsa nidaog og gold ug bronze sa table tennis.
Si Jessica Jawad-Honoridez sa Cebu nidaog sa iyang ikaduhang best coach title, samtang usa sa iyang batos nga si Jennifer Jacalan nidaog sa most outstanding athlete award.
Sa lawn tennis, ang Cebu nidaog sa men’s singles ug miharos sa team competition. Ang tandem nilang Floreza Alesna ug Kennex Abadia nidaog og bulawan sa mixed doubles.
Sa sayo pa, si Abadia nidaog sa singles events.
Ang Cebu nidaog og silver medals sa men’s ug women’s volleyball events.
Mikabkab sab og duha ka bulawan ang Cebu sa karatedo, samtang ang football squad nitapos sa ikatulo.
Ang women’s basketball team nidaog sab og silver, apan ang men’s team pakyas pagdaog og medalya.
Ang track and field team nga gipangulohan ni Lindley Fran Navaja maoy daghang natampo og medalya alang sa Cebu sa ilang 17-5-8 medal tally.
Si Navaja, kinsa giilang labing kusog nga atleta sa 2009 PRISAA mitigom og lima ka bulawan alang sa Cebu, lakip na ang pagpilde sa sakop sa nasudnong koponan nga si Junrey Bano sa 200m final.
Ang Cebu nakatigom sab og 7-7-10 sa swimming, 1-3-3 sa taekwondo, 4-6-5 sa badminton ug 2-2 sa dancesport.
Sa kinatibuk-an, ang Cebu mihipos og 50 golds, 47 silvers ug 45 bronzes sa modified medal count. – BANAT NEWS