AMBL milubong sa L.A.

CEBU, Philippines – Gikuso-kuso sa AMBL Enterprises and Advertising ni businessman Allan Lim ang L.A. quintet pinaagi sa pag-iskor og 101-81 nga kadaugan aron pag-abante ngadto sa ikaduhang luna sa nagpadayong Basketball Association of Ramos (BAR) Vice Mayor Mike Rama Cup 2009 didto sa barangay Cogon-Ramos gym.

Ang L.A. maoy unang mi-arangkada ug miposte kini’g 25-15 nga labaw pinaagi sa pagtimon ni ex-commercial player Kent Salvador, apan wala molahutay og dugay ang ilang kainit ug nahiapsan sila sa halftime, 46-33.

Nagsugod og apas ang AMBL dihang gipahugtan ni coach Amor Ciabo ang ilang depensa ug sukad niadto wala na makabangon ang L.A.

Si Robert Abasolo miposa og 22 puntos, samtang sila si Rey Jumamel ug Lito Navarro miamot og 12 puntos matag usa alang sa AMBL nga naghupot karon og 5-1 win-loss record, sunod sa Ginga Hot Mocha Mix nga adunay limpiyong 6-0 nga baraha.

Si Jojo Mante mao sab ang nangulo sa L.A. pinaagi sa iyang 30 puntos, gisundan ni Salvador nga adunay 19 puntos.

PUNTOS MATAG USA

AMBL (101) - Abasolo 22, Jumamel 12, Navarro 12, Lim 11, Manreal 10, Sullano 10, Gallway 6, Felicitas 5, Alesna 5, Loreto 4, Quiroz 4, Tejero 1
L.A. (81) - Mante 30, Salvador 19, Salaritan 7, Ybañez 6, Bernal 6, Aliñabon 4, Lugod 2, Cavalida 2, Rojas 2, Sala 2, Solon 1 – BANAT NEWS