RP team nag-una sa Cacoy Doce Pares World Eskrima-Arnis championships

CEBU, Philippines – Ang host-Philippine team mao na karon ang nag-una sa kumbati sa Cacoy Doce Pares World Eskrima-Arnis Championship didto sa City Sports Club-Cebu sa Ayala Business Park.

Ning pagsulat, ang   host-Philippines mikabkab na og unom ka bulawang medalya.

Si Ronald Farol, kinsa sakop sa Philippine National Police (PNP) maoy unang mikubkob og bulawan sa men’s double weapon form. 

Si Miko Cañete, ang apo ni Supreme Grand Master Ciriaco “Cacoy” Cañete, maoy midaog sa bulawang medalya sa 18-year old and above boys single stick form, samtang si June Babe Caballes misakmit og bulawan sa double weapon sa 18-year old boys division.

Ang nasudnong koponan nidaog sa tanang medalya sa demonstration category.

Ang Australian Grand Master nga si Vince Palumbo, tag-iya sa International Combative Martial Arts Academy nga nagbase didto sa Adelaide, Australia, maoy midaog sa bulawang medalya sa single stick form sa men’s division dihang iyang gilupig si Dino Haynes sa USA ug si Riel Taba sa RP team.

Si Giuseppe Zampaglione, usa sa pambato ni Palumbo nahimutang sa ikaduha, sunod ni Caballes sa boys double weapons form, samtang si Jhun Ahr Sudaria sa RP team mipahiluna sa ikatulo.

Si Glenn Gardiner, ang lider sa Indonesian team, maoy nidaog sa silver sa double weapon form ug si Idi Tindiano sa CMAA Club sa Indonesia maoy nidaog sa bronze medal.  

 Ang tulo ka adlaw nga torneyo tapuson karon. Human sa kompetisyon, si Grandmaster Cañete mopahigayon og farewell banquet alang sa tanang mga partisipante didto sa iyang balay sa dalan C. Padilla street, ning siyudad. – BANAT NEWS