Banal, Amonsot balik aksiyon

CEBU, Philippines – Bangis ug mangtas nga mga kaatbang ang atubangon nilang AJ 'Bazooka' Banal ug Czar Amonsot sa ALA Boxing Gym sa ilang pag-away og balik dinhi sa Sugbu nga maoy main event sa "Tuloy Ang Pagsubok (The Challenge Continues) card nga gipasiugdahan sa ALA Promotions ug sa higanteng television network ABS-CBN karong Mayo 16 diha sa Cebu Coliseum.

Si Banal (18-1, 15KOs) mosukod sa abilidad sa kanhi world champion Mbwana Matumba (18-3, 10KOs) nga giila isip "African Golden Boy', samtang si Amonsot (19-3, 1, 11KOs) makigsinukliay og kumo batok ni Morris Chule sa Kenya (11-6-2, 8KOs) sa ilang 10 ka hugna nga engkuwentro.

Mao kini ang unang away ni Amonsot dinhi sa Sugbu sukad siya napilde pinaagi sa 10th round knockout ngadto ni Panamian Rafael 'El Torito' Concepcion atol sa ilang interim WBA super flyweight championship niadtong Hulyo 26 sa miaging tuig diha gihapon sa Cebu Coliseum.

Apan si Banal nakabangon dihang iyang gipakamang si Nouldy Manakane sa Indonesia sa 4th round atubangan sa iyang dumadapig niadtong Enero 31 didto sa Island City Mall carpark sa Tagbilaran City.

Sa laing bahin, ang rising ALA star nga si Jason Pagara sa Cagayan de Oro City mopakita'g aksiyon sa undercard batok ni Hero Katili sa Indonesia, samtang si Larry 'Bon Joi' Cantillas sa Lutopan, Toledo City makighamag ni Reman Salim sa Bacolod City.

 Ang mga tiket mapalit sa P1,500 sa VIP first row, P1,250 second row, P1,000 third row, P500 sa ringside, P300 sa lower box ug P50 alang sa general admission. - BANAT NEWS