Earth Run karong Domingo
CEBU, Philippines – Gatosan ka runners ang subling magginukdanay sa kadalanan sa ipahigayong Earth Run 2009 karong Domingo.
Ang lumba nga gipasiugdahan sa Global Legal Actions on Climate Change (GLACC) sugdan sa alas-5 sa buntag manukad diha sa Cebu Provincial Capitol ground ug adto tapuson sa Cebu International Convention Center (CICC).
Ang lumba gibahin sa tulo ka kategoriya -- 10K, 5K ug 3K run.
Mga runners sa matag dibisyon nga molampos sa lumba hatagan og sertipiko.
Tumong sa GLACC sa pagpahigayon sa Earth Run mao ang pagpadangat sa mensahe sa pag-amping sa atong kalikupan pinaagi sa lumba sa dagan.
Ang Earth Run gisuportahan usab sa Cebu Provincial Government ubos sa liderato ni Gobernador Gwendolyn 'Gwen' Garcia.
Aduna kini registration fee nga P150 libre na ang jersey ug snack. Alang niadtong buot mosalmot ug sa dugang mga kasayoran, mahimong mobisita diha sa Cebu City Sports Center (CCSC). (Lemuel P. Maglinte) (BANAT NEWS)
- Latest
- Trending
