Ornopia, Sanchez misakmit 2 ka titulo sa MS moto-x

CEBU, Philippines - Misakmit og tag-duha ka korona si reigning "Rider of the Year" Seigfred Ornopia sa Keiz BJ Racing Team ug Donkey Sanchez sa 4th leg sa Castrol-backed 2009 MS Motosuit Motocross Series nga nagsilbe sab isip 11th Ornopia Cup niadtong Domingo didto sa Calambua sa San Remigio sa amihanang bahin sa lalawigan sa Sugbu.

Si Ornopia, ang igsuon ni event organizer ug MS Motosuit big boss Lou Ornopia, nanghawod sa beginners open production ug sa executive A. Nagsunod niya sa beginners open sila si Sanchez, Ayen Ledesma, Keith Galaura ug Ryan Querol.

Si Adonis Famador nahimutang sa ikaduha sa executive A, samtang ang ikatulo hangtod sa ikalima nga luna gi-okupar nilang Aloy Igot, Nonoy Reluya ug Gener Sicad.

Sa iyang bahin, si Sanchez maoy nidominar sa novice enduro ug sa local enduro categories. Si Ledesma mitapos sa ikaduha sa novice enduro, gisundan ni Banjo Monilar, Bonnie Bustillo ugJoseph Panulde.

Si Bustillo nalandig sa ikaduha sa local enduro, gisundan ni Querol ug Dhong-Dhong Batiquin.

Wala sab magpabitin ang MS Motosuit image models nga sila si Jon-Jon Adlawan ug John Flores ug ingon man si Bornoc Mangusong.

Gidominar ni Adlawan ang expert division dihang iyang napuhalan si Ted Conde, kinsa nahimutang sa ikaduha nga dapit. Ang ikatulo hangtod sa ikalima nga dapit naangkon nilang Ambo Yapparcon, Jovannie Abellar ug Pepo Rubi.

Si Flores midaog sab og championship trophy human manghawod sa novice open production, gisundan ni Ornopia nga mipuwesto sa ikaduha. Ang ikatulo ug ikalima nga dapit nakuha nila ni Igot, Querol ug RJ Con-Ui.

Sa laing bahin, si Manguson, mao sab ang naghari sa prop open class ug iyang gilupig silang Paolo Inoc, Jubenile Abellar, Adlawan ug Yapparcon. Hinuon, si Inoc nakadala og titulo human manghawod sa intermediate open human gipilde sila si Conde, Abellar ug Ambo ug Weng Yapparcon.

Si Adonis Famador naghari sa executive B batok ni Jun Enriquez, Reluya, Gener Sicad ug Joel Andrin.

Ang top five finishers sa executive C mao sila si Butch Flores, Dan Gastador, Arvin Montejo, Gerry Sicad ug Felipe Montejo.

Sa mini class 85, ang niguwang kampiyon mao si Rey Quirol, gisundan ni Renato Manguson, Estong Fajardo ug Earl Jean Brylle Ornopia, ang anak ni Seigfred.

Si Brylle Ornopia misunod sab sa lakang sa iyang amahan dihang iyang gidominar ang peewee division. Si Iñigo ug Iñaki Diaz maoy mi-okupar sa ikaduha ug ikatulo nga dapit, samtang si Tom-Tom Largosa niangkon sa ikaupat.

Hinuon, si Iñaki Diaz maoy naghari sa peewee 10-below. Si BJ Pepito mitapos sa ikaduha, gisundan ni Anya Diaz, Kerry Ornopia ug Marian Yapparcon.

Ang top three finishers sa peewee 7-below mao sila si Joseph Enriquez, Venz Batulan ug Kerry Keizer Ornopia. - BANAT NEWS