PRISAA VII mikabkab og golds

CEBU, Philippines - Gisugdan sa PRISAA VII ang ilang kampanya sa 2009 Private Schools Athletic Association (PRISAA) National Games pinaagi sa pagkabkab og duha ka golds, duha ka silvers ug duha sab ka bronzes kagahapon didto sa Naga City.

Si Jefferson Querubin midominar sa men’s shot put sa gilay-on nga 12.05 metros. Ang iyang teammate nga si Francis Beriso mitiltil og bronze medal sa distansiya nga 11.69 metros.

Wala sab magpalupig ang PRISAA VII swimmers kinsa mihakot og usa ka gold ug duha ka silvers.

Si Zoe Menguito sa Dumaguete City mikubkob og bulawan sa women’s 200m butterfly. Iya sab nga gihatagan ang Central Visayas og usa ka silver sa 4x50m medley relay uban nilang Maribeth Ababon, Kruzette Solijon ug Gwencent Canada. Si Canada nihakot sab og silver gikan sa 100m breaststroke event. - BANAT NEWS