Kickboxing sa 'Lacion sa Abril 24

CEBU, Philippines - Ang D.B.D. Tigers Hall of Martial Arts S.D.G. uban sa pakigtambayayong sa K of C Tayud Consolacion Council 9359 mapasigarbuhong mopasiugda og 2009 Boxing-Kickboxing "AFC Superfights" karong Biyernes, Abril 24 diha sa Tayud, Consolacion Sports Complex sa lungsod sa Consolacion, Cebu.

Katorse ka paresan ang mopakita'g aksiyon ning usa ka adlaw nga kompetisyon nga pagasalmotan sa mga K1 fighters gikan sa General Santos City, Negros Oriental, Ormoc-Leyte ug host Cebu City.

Ang maong kompetisyon usa lamang sa mga highlights sa tinuig nga kapistahan ni Senior San Jose, ang mahal nga patron sa Tayud.

Usa kini ka matang aron paglingaw sa katawhan sa Tayud ilabi na sa mga kabatan-onan, kinsa mahigugmaon sa paugnat sa kusog.

Gawas pa niini, makita sa linawas ang mga nag-unang radio ug tv personalities dinhi sa Sugbu atol sa maong kalihukan.

Ang maong kompetisyon nga giisip sab nga Vis-Min showdown natukod pinaagi sa mga paningkamot sa kugihang organizer Master Dann B. Diaz uban sa suporta sa K of C 9359 Council ubos sa liderato ni Bro. Preston Pilapil ug sa Tayud Barangay Council ubos ni barangay captain Rogelio Maquilan.   (BANAT NEWS)