CEBU, Philippines - Nag-anam-anam na'g pangabot dinhi sa Sugbu ang mga langyaw'ng partisipante sa umaabot nga dakung kalihukan sa Cacoy Doce Pares World Eskrima Federation -- 2009 World Eskrima Arnis Championship karong Abril 24-26 diha sa City Sports Club-Cebu sa Cebu Business Park.
Ang gitawag og early bird mao ang Australian master nga si Christopher Nasilowski kinsa niabot kagahapon. Mosunod dayon og bisita sa Sugbu ang laing Australian nga si Grand Master Vince Palumbo uban sa iyang mga tinun-an sa eskrima didto sa Adelaide ug dayon ang mga eskrimadors nga taga New Zealand sa Abril 23.
Matud pa ni Grand Master Dennis Cañete, moabot ang tanang partisipante sa world tournament usa ka adlaw sa dili pa ang kalihukan kay aduna may ipahigayon nga welcome dinner ang Cebu City Hall ubos sa pagdumala ni vice mayor Mike Rama.
Kapin sa 100 ka eskrimador gikan sa nagkalain-laing nasud ang mosalmot nga naglakip sa Indonesia, Germany, Poland, Italy, Canada, England, Spain ug USA. Ang mga eskrimador sa host Philippines pulos mga tinun-an ni Grand Master Ciriaco 'Cacoy' Cañete.
Ang World Eskrima gipaluyohan sab sa kagamhanan sa dakyaban sa Sugbu ug sa Department of Tourism ubos ni Secretary Ace Durano.
Si Dennis Cañete nagkanayon nga nagsugod na sab ang eskrima summer training sa Doce Pares alang sa gustong mokat-on sa maong matang sa sports. Alang kini sa mga batan-on ug kutob lang sa 30-50 ang dawaton pinaagi sa first-come first-served basis. Ang training molanat hangtod sa Hunyo sa dili pa magsugod ang klase.
* * *
Bag-o lang gisugdan ang Rudy Espinosa Cup basketball tournament didto sa Toledo City ug ingon man ang Edsel Galeos Cup didto sa lungsod sa Argao.
Maayo kining mga matang sa proyekto matag summer aron dunay kalingawan ang katawhan ubos sa atong gi-atubang karon nga global financial crisis. Ug alang sa mga batan-on, kini maoy usa ka matang sa paglalambo sa inyong abilidad aron aduna kamo’y kahigayonan nga mahimong varsity players ug malibre ang inyong pagtungha sa high school ug sa kolehiyo inay magsige'g suyop og shabu o marijuana.
Nagtanyag og dagkung kantidad nga cash ang duha ka liga busa daghang midugok nga teams ug kini makatabang sab kanila ilabi na ngadto sa mga nang-retiro nga mga players o migradwar na sa kolehiyo nga gustong kanunay himsug ang panglawas.
Usa sa mosalmot mao ang CDS Builders nga nag-base didto sa Toledo, ang kanhi Atlas Consolidated Mining Corporation nga karon naila na nga Carmen Copper Corporation.
Ang ilang coach mao si Boboy Cal, ang team consultant si Romy Cal, apan sa laing CSD (Contractors, Shipping ug Distributors) nga gitawag og Power Brokers. Si Romy maoy head coach, ang team manager mao si Konsehal Vince del Mar sa Naga, Cebu, ang general manager si Roland Lucero, ang team consultant si Serge Villacorta ug ilang mga higala nga sila si Rudy Tallo ug Peryong Jayme.
Usa sa team official mao si Mike Sususco, ang haring gangis nilang tanan.
* * *
SG Miscellaneous. Advance birthday greetings to my sister Gina M. Quindao of barangay Owak, Ormoc City this coming April 25. Belated greetings to my friend Bruce Cunningham of Fort Wayne, Indiana, USA who turned a year older last April 14, the day when the Titanic hit the iceberg. Cunningham is holding his own basketball clinics in the island of Camotes starting in the town of San Francisco and to be extended into the barangays with the support of Mayor Ale Arquillano. - BANAT NEWS