Latonio mopahigayo'g try outs

CEBU, Philippines - Gipahibalo ni coach Raul Latonio Sr. sa University of Southern Philippines Foundation (USPF) Panthers nga mopahigayon siya'g try-outs alang ngadto sa mga players nga gustong mahimong sakop sa ilang varsity team nga morepresentar alang sa umaabot nga 2009 Cebu Schools Athletic Foundation, Inc. (CESAFI) season.

Ang try-outs pagahimuon matag adlaw gikan sa Lunes hangtod Biyernes sa alas 5 ngadto sa 7 sa hapon diha sa USPF gym sa Lahug campus.

Matud pa ni Latonio nga ang players nga mapilian ug mahimong sakop sa Panthers hatagan og full scholarships ug cash allowance. Libre sab sa pagpuyo sa ilang quarters ang mga players nga dili lumad taga-Sugbu. 

Mihuyang og samot ang line-up sa Panthers ilabi na sa pagbalhin sa ilang pambatong tirador nga si Moncrief Rogado ngadto sa University of Cebu (UC) Webmasters. Si Rogado maoy giilang CESAFI 3-point king.

Apan bisan og naanugonan pag-ayo si Latonio sa hukom ni Rogado pagbalhin ngadto sa UC, iyang paningkamotan nga makakita siya’g susama og abilidad ni Rogado pinaagi sa pagpahigayon og try-out. Si Latonio dili sab makapugong sa iyang mga players kun mohukom kini sa pagbiya sa team ug nahitabo na kini kanila ni Alfred Belande, Clifford Maguate ug Gilbert Gallarde nga atua na magduwa sa Southwestern University (SWU) Cobras. - BANAT NEWS