CEBU, Philippines - Moarangkada na sab ang mga motocross teams dinhi sa Sugbu ug sa bisitang koponan gikan sa ubang mga dapit sa Visayas ug Mindanao ang moduaw sa yutang natawhan sa MS Motocross Series karong adlawa nunot sa pagpahigayon sa 11th Ornopia Cup didto sa Calambua, San Remigio.
Nagsugod ang Ornopia Cup didto sa San Remigio sa tunga-tungang bahin sa 1990 isip usa sa mga highlights sa tinuig nga kapistahan sa maong lungsod.
Bisan pa sa kalibotanhong krisis ug sa nagkamang nga pag-ugmad sa lumba sa motocross dinhi sa Sugbu ug sa tibuok nasud, ang pamilyang Ornopia padayon gihapon nga mipasiugda og paugnat sa kusog didto sa San Remigio.
Gawas nga usa lang ka side show, ang Ornopia Cup nahimo na nga series ug naila na karon nga MS Motosuit Motocross Series.
Ang MS Motosuit usa ka kompaniya dinhi sa Sugbu nga tiggama og maayong kalidad nga mga hapin sa lingkoranan sa motorsiklo ug sakyanan nga gipanag-iya ni Lou Ornopia.
Sa laing bahin, ang 11th Ornopia Cup, magsilbeng fourth leg sa series ning tuiga nga gipresentar sa Castrol Philippines. (BANAT NEWS)