UV nakakuha lingkoranan sa semis

CEBU, Philippines - Gipukan sa University of the Visayas (UV) ang Iloilo Doctors College aron pag-angkon og lingkoranan sa semifinal sa 13th Nestea Fit Beach Volley National Circuit Visayas leg kagahapon didto sa Piazza Area sa Parkmall beach sand court.

Ang UV mipukan sa Iloilo, 21-18, 22-20 alang sa ilang ikatulong daog ning maong torneyo nga gipaluyohan sa Ipanema, Speedo, Parkmall, L'Oreal Paris Elseve, Nautilus ni PJ Arañador, Mikasa, D'Mall D'Boracay, Tagum Beach Volley Drome sa Rotary Park, Hey! Jude Resort, Boracay Mandarin Island Hotel, La Carmela de Boracay Resort Hotel ug Crystal Sand Beach Resort.

Nakaangkon sab og lingkoranan sa semis ang defending champion Foundation University dihang ilang gipilde ang University of San Carlos, 21-12, 21-14.

Ang University of Southern Philippines Foundation mikulit sab og daog pinaagi sa pagpilde sa University of St. La Salle-Bacolod sud sa tulo ka sets, 24-22, 18-21, 18-16, samtang ang University of San Jose-Recoletos nidaog batok sa University of Negros Occidental Recoletos, 21-16, 21-14 aron paglig-on sa ilang kampanya alang sa semifinal.

Sa laing bahin, ang defending women's champion Southwestern University nakarekober gikan sa ilang kapildihan sa opening day pinaagi sa pagposte og 18-21, 21-17, 15-12 nga kadaugan batok sa USLS. Gipukan sab sa UV ang Foundation, 21-19, 21-15, ang University of San Agustin midaog sab batok sa Central Philippine University sulod sa tulo ka sets, 19-21, 21-18, 15-11. – BANAT NEWS