Turno na sa Boholanos

CEBU, Philippines - Turno na sab sa mga batan-ong Boholanos sa pagpakita sa ilang katakus sa ipahigayong Children’s Community Games karong adlawa didto sa Carlos P. Garcia Sports and Cultural Complex sa Tagbilaran City.

Mangulo sa opening ceremonies karong buntag mao si Philippine Sports Commissioner Fr. Vicente ‘Vic’ L. Uy, SVD, ang nagpaluyo ning maong kalihukan.

Ang Bohol edition lahi itandi sa inaugural staging sa dakbayan sa Sugbu niadtong miaging tuig. Gikan sa barangayan format, batukan kini karon tali sa LGUs uban sa Maribojoc, Loay ug host Tagbilaran City alang sa overall crown.

Bisan og usa lang kini ka three-way fight, si PSC-7 coordinator Danilo Villadolid nagkanayon nga halapad ang ilang paghagpat og mga atleta.

Ang sports events nga tigian mao ang athletics, table tennis, badminton, basketball, chess, volleyball, amateur boxing, sipa ug taekwondo. – BANAT