Mga koponan sa Cebu miarangkada pagsugod

CEBU, Philippines - Miarangkada gilayon ang koponan sa Sugbu sa men's ug women's division pagsugod sa 13th Nestea Fit Beach Volley National Circuit Visayas eliminations didto sa nagsugwak nga Parkmall sands court sa Mandaue reclamation area.

Ang University of San Jose-Recoletos (USJ-R) belles ni Cebu Sports Hall of Famer coach Grace Antigua mipakita sa bangis nila nga duwa aron pagpukan sa Central Philippine University (CPU) sud sa duha ka sets, 21-18, 21-13.

Ang bag-ong tandem nilang Genie Sabas ug Mary Joy Bonita mipamatuod nga lisud silang buntogon sa CPU nga gibitoonan nilang Jovelyn Gonzaga ug Dhannylaine Demontaño.

Sa laing bahin, sila si Jerymie Montalvo ug Chona Gesulga sa University of San Carlos (USC) milampurnas sab sa tandem nilang Salamatu Yushawu ug Catherine Mortol sa Foundation University (FU)-Dumaguete City, 21-10, 21-15.

Sa men's division, ang USC ug ang University of the Visayas (UV) gisubhan sab og daog sa ilang unang tahas.

Sila si Roderick Arenasa ug Bon Vincent Estrera sa USC milansang og sunod-sunod nga daog.

Ang USC ni coach Eugene dela Cerna mipukan nilang Verdin Paul Deocampo ug JM Firmalino sa University of San Agustin (USA), 21-15, 23-21.

Hinuon, nag-agi pa sila og tunokon nga dalan una nila maangkon ang kadaugan batok nilang Joemar Hernandez ug Jan Mhar Basinang sa Colegio de la Purisima Concepcion (CPC), 12-21, 21-18, 15-12.

Sa ilang bahin, ang UV ni coach Raffy Briones nakasinati sab og susama sirkumstansiya dihang miagi sab kini og tulo ka sets batok sa University of Negros Occidental Recoletos (UNOR).

Ang bag-ong tandem sa UV nga sila si Jade Becaldo ug Precioso Bendijo mipukan nilang John Paul Geollegue ug Mark Hojilla, 21-19, 14-21, 15-8. – BANAT NEWS