CEBU, Philippines - Mikulit sa ilang ikaupat nga daog ang AMBL Enterprises and Advertising ni businessman Allan Lim human ilang gipukan ang VRJ Eng’g., 110-99 niadtong Lunes sa gabii sa nagpadayong Basketball Association of Ramos (BAR) Vice Mayor Mike Rama Cup 2009 didto sa Cogon-Ramos gym, ning dakbayan.
Sikit kaayo ang iskor tali sa duha ka teams gikan sa pagsugod hangtod na sa pagkahuman sa first half diin ang AMBL milabaw lang og uno punto, 47-46.
Gumikan sa presensiya sa ilang team manager Myla Lim, ang AMBL madasigon kaayo nakaduwa ug milusad og 34-24 nga rally aron pagposte og 10 puntos nga bentaha, 81-71 paingon na sa final quarter.
Sila si Allan Lim, Fritz Sullano ug Yokyok Alesna nagtambayayong sa nanghinapos nga bahin sa duwa aron tunolan og laing daog ang AMBL, kinsa nagbitbit og 4-1 nga baraha.
Si Abasolo maoy nangulo sa AMBL sa iyang 30 puntos, samtang si Lim miamot og 20 puntos ug si Sullano mitampo og 18 puntos.
Si Anthony Apollo Taghoy mao sab ang nangu sa VRJ Eng’g. pinaagi sa iyang 22 puntos, gisundan nilang USPF Panther Jojo Baldago ug Jojo Turlao nga parehong mi-iskor og 19 puntos matag usa.
Puntos Matag Usa
AMBL (110) - Abasolo 30, Lim 20, Sullano 18, Alesna 15, Navarro 10, Gallway 7, Monreal 6, Tejero 2, Piñas 2
VRJ (99) - Taghoy 22, Baldago 19, Turlao 19, Bamba 18, Limpangog 12, Rubi 10. – BANAT NEWS