Critical judgment
Sa kinabuhi ug career sa usa ka bilyarista, dili gayod kalikayan nga moabot ang higayon nga mopakanaog siya og critical judgment. Kini aron pag-double check kun epektibo ba ang iyang game plan.
Sumala sa librong Snooker and Billiards: "The really critical judgment is to identify the basic angle from any position on the table."
Tiaw mo kana. Kun maoy atong basihan ang maong pamahayag, klaro kaayo nga lapad nga hilisgotan ang bahin sa critical judgment. Kining maong aspeto sa dula nagtangkil og daghang kasangahan sa pagtuon.
Ang critical judgment usa ka maukiton, mahangkubon ug makuti nga pag-usisa ug pag-analisar sa plastada sa mga bola ibabaw sa billiard table. Sa paghimo sa ingon, kinahanglang sutaon sa magdudula ang basic angle nga posibleng makatabang niya sa pagtuman sa iyang preparasyon.
Ug dili kini pagahimuon sa usa lang ka position kun dili sa nagkadaiyang position. Kini aron pagsil-ip kun may lutsanan ba gayod ang imong preparasyon kun daw ugaling dili moplastar ang mga bola sa dapit sa lamesa diin gusto mong adto sila mopahimutang human sa imong pagpahigayon sa usa ka tayada.
Sa higayon nga masuta na nimo nga mipabor gayod nimo ang plastada sa mga bola, ayha ka pa mopahigayon pagpanako. Sugdan na nimo'g punting ang bolamano ug seguron mo nga moigo gayod kini ngadto sa object ball nga gusto nimong tirahan.
Ang critical judgment maingon tang usa ka matang sa defensive tactic. May reserbang panagana mao nga kinahanglang suhiron una ang nagkadaiyang anggulo sa lain-laing position aron pagsuta kun paborable ba sa gihikay nga game plan an plastada sa mga bola sa ibabaw sa lamesa.
Usahay mataligam-an sa magdudula ang critical judgment kay matental man siya sa pagtira gilayon kun makakita nga may opening alang sa iyang preparasyon. Pero kun moapil ang magdudula og torneyo, mas maayo nga iyang i-apply ang critical judgment sa iyang pagdula aron paghatag og diyutay'ng kasiguroan sa iyang pagdula. Kini gihimo usab sa daghang malampusong bilyarista karon.
* * *
(Mga sugyot ug pakisayod? Text sa 0910-8105522) –BANAT NEWS
- Latest
- Trending
