CEBU, Philippines – Banatan na karong adlawa ang Game-1 sa “best-of-five” 2009 Smart Liga Pilipinas Conference II National Finals tali sa host ug top seed Misamis Oriental Meteors ug defending National Champion ug third seed M. Lhuillier Kwarta Padala-Cebu Niños didto sa Xavier University Gym sa Cagayan de Oro City.
Ang Meteors ni Gov. Oscar Moreno ug coach Jun Noel bag-o pang nakalingkawas sa ilang makutas nga Game-5 semifinal series batok sa Quezon Red Oilers, 3-2, samtang ang Cebu Niños ni businessman-sportsman Michel Lhuillier ug coach Raul ‘Yayoy’ Alcoseba miharos sa second seed Tracep-Laguna Stallions, 3-0.
Sa unang hugna sa playoffs, ang Cebu Niños mipalagpot sa Ilocos Sur Bravehearts pinaagi sa pagharos sa ilang tulo ka duwa, 3-0, samtang ang Meteors napukan sa ilang unang duwa batok sa eighth seed MP Warriors sa GenSan, apan nakarekober sa sunod nga tulo ka duwa aron pag-abante sa semifinals, 3-1.
Ang MisOr misugod sa conference pinaagi sa pagdaog sa ilang unang-tulo ka leg assignments sa Zamboanga, Laguna ug Cebu. Kausa lang sila napilde sa 12 ka duwa. Mipahimutang sila sa Third sa ilang final leg sa ilang balwarte. Ila sab nga naangkon ang unang dapit ug homecourt advantage sa tibuok playoffs ning maong liga nga gipaluyohan sa Smart, ML Kwarta Padala, Accel, Air 21, Burlington, Pagcor Sports, Laptop Phoneshop Exchange, Nature’s Spring Water ug Molten ubos sa pagtugot sa Samahang Basketbol ng Pilipinas (SBP). –BANAT NEWS