Huni sa Jazz nagkalubad

CEBU, Philippines - Gikan sa ika-upat ug labing menos ikalimang pwesto sa sayong bahin ning tuiga, nag-anam na kayabag ang sonata sa Utah Jazz kinsa nahimutang na karon sa ikawalong pwesto ug kagahapon, gitiwasan pa gyud sila sa Golden State Warriors kinsa mi-iskor og 118-108 nga kadaugan sa nagpadayong aksiyon sa National Basketball Association (NBA) didto mismo sa balwarte sa Jazz sa Energy Solutions Arena sa Salt Lake City, Utah.

Sa ilang nahimutangan, ang Jazz daw molukso padung sa pangpang tungod kay ang. no. 1 sa West ang Los Angeles Lakers maoy ilang makontra sa first round sa playoffs unya sa Abril 16.

Si C.J. Watson mi-iskor og career-high 38 puntos alang sa Warriors nga igo lang nanglawgaw kay dili man sila makasulod sa playoffs sa ilang 29-51 nga baraha. Ang iyang teammate nga si Robert Kurz mi-iskor sab og career-best 21 puntos.

Ang kanhi career-high ni Watson 26 puntos batok sa Sacramento Kings kaniadtong Enero 14 samtang ang kanhi career-high ni Kurs 20 puntos batok Denver Nuggets kaniadtong Disyembre 13 sa miaging tuig. Si Watson mipasulod sab sa tanang 16 niya ka foul shots.

Laing tulo ka Warriors ang pulos mitampo og double figures nga sila si Kelena Azubuike sa iyang 18 puntos, si Anthony Morrow sa iyang 13 puntos ug si Anthony Randolph sa iyang 11 puntos. Ang Warriors nakalabaw og 17 puntos ug ang Jazz wala makasikit labaw sa singko puntos.

Ang Jazz kinsa adunay 47-33 nga baraha, gipangulohan nilang Deron Williams kinsa mi-iskor og 26 puntos uban ang 14 ka assists ug Carlos Boozer kinsa may 25 puntos ug 12 ka rebounds.
Sa laing bahin, midaug ang New Jersey Nets batok sa Orlando Magic, 103-93 hinungdan midailos ang Magic ngadto sa no.3 sa East ug nasakmit sa Boston Celtics ang ikaduhang luna sunod sa Cleveland Cavaliers. Ang Celtics nakakuha na’g 60-19 nga baraha samtang ang Magic adunay 58-22 nga baraha.

Walay swerte ang Magic kay human mapiang si Rashard Lewis sa miaging adlaw, napiang sab kagahapon atol sa ilang duwa batok Nets ang usa sa mga points makers nga si Hedo Turkoglu kinsa nagtakiang human siya maka-iskor og 16 puntos.

Sa laing duwa, gipahugtan sa Chicago Bulls ang ilang ika-pito nga pwesto human sila modaug batok sa Charlotte Bobcats, 113-106 ug gipukan sa Indiana Pacers ang Detroit Pistons, 106-102 kinsa maoy ikawalo sa East.

Midaug ang Portland Trail Blazers batok sa LA Clippers, 87-72, midaug ang Phoenix Suns batok sa Minnesota Timberwovles, 110-97 ug midaug ang Milwaukee Bucks batok sa Oklahoma City Thunder, 115-98. – GGM (BANAT NEWS)