P60,000 nga ganti gigahin alang sa Mandaue Open Tennis Championship

CEBU, Philippines - Nahikay na ang tanan alang sa pagpahigayon sa labing daku nga lawn tennis events dinhi sa Sugbu nga giulohan og Mandaue City Open Tennis Championship karong Abril 28-29 diha sa Mandaue City Tennis Club courts.

Malabong P60,000 nga ganting salapi ang giandam ning duha ka adlaw nga kompetisyon nga gibahin sa duha ka dibisyon -- singles ug doubles events.

Ang makampiyon sa singles category makadawat og P20,000, samtang ang mopahiluna sa ikaduha makaangkon og P10,000. Mao usab ang premyo nga madawat sa nag-unang duha ka performers sa doubles events.

Ang entry fee nagkantidad og P300 sa singles ug doubles.

Mahimong makuha ang registration forms sa MCTC canteen pinaagi ni Fil Latonio. Ang deadline sa registration hangtod lamang sa Abril 27. Ang qualifying matches himuon sa Abril 28, samtang ang main draw tigian pagka sunod adlaw.

Alang sa dugang mga kasayoran, mahimong motawag ni Adonis Lominoque sa 0906-4837736, Noel Antigua sa 0917-727-4752 o ni Raul Sanchez sa 420-7821 ug sa 346-9460.

Gipaluyohan sa kagamhanan sa dakbayan sa Mandaue ubos sa liderato ni Mayor Jonas Cortes, ang higanteng kompetisyon magsilbeng usa sa mga highlights sa tinuig nga pangilin sa ilang mahal nga patron St. Joseph the Worker karong Mayo 7 ug 8. - Yoyo R. Abayan (BANAT NEWS)