CEBU, Philippines – Gilangkat sa Don Bosco Technology Center (DBTC) Team-A booters ang korona sa 10-under division sa 5th Del Monte Football Cup pinaagi sa pagpukan sa Ateneo de Manila sa final didto sa Del Monte Philips field sa Bukidnon.
Hinuon, miagi pa og makutas nga kumbati ang DBTC Team-A ni coach Glen Ramos una nila maangkon ang nipis nga kadaugan, 2-1.
Ang DBTC Team-A niabante sa kampiyonato dihang ilang giharos og daog ang upat nila ka duwa sa elimination round batok sa Viking Football Club, Olles ug Celestial Football Club.
Ang DBTC Team-A gipangulohan ni MVP awardee Glen Thomas Ramos. Nakakuha sab siya og suporta gikan nilang Joseph Kei Ceniza, Jose Antonio Salazar, John Clyde Vitualla, Agustin Rafael Roa, Erich Rafael Orale, Miguel Mercader ug Jon Joseph Rena.
Sa laing bahin, ang igsuong koponang DBTC Team-B wala sab magpabitin og mitapos kini sa ikatulong dapit. –BANAT NEWS