Basak Inter-sitio Sportsfest 2009 gisugdan na

CEBU, Philippines – Pormal na nga gibuksan ang labing unang Inter-sitio Summer Sportsfest 2009 sa barangay Basak sa lungsod sa Compostela,   niadtong Domingo didto sa Felix R. Quiño Multi-purpose Gym, Compostela, Cebu.

Gisugdan ang kalihukan pinaagi sa parada sa mga partisipanteng koponan uban sa barangay ug SK officials gikan sa Calmaran paingon sa nahisgutang gym.

Kawhaa'g-duha (22) ka teams nga sakop sa barangay Basak ang nisalmot sa maong torneyo nga gibahin sa upat ka dibisyon -- Midget, SK Senior-A ug Senior-B.

Ang Midget, SK ug Senior-A adunay tag-unom ka entries nga mao ang Proper-I (LG Team), Proper-II (Tabok Team), Tagasa, Calmaran, Danikop ug Treefarm, samtang ang Senior-B adunay upat ka teams nga naglakip sa Danikop, Tangke, Treefarm ug Proper-I.

Ang amahan sa barangay Basak nga si Felijur Quiño, kinsa mao sab ang ABC President sa Compostela, mihatag sa iyang mahinungdanong mensahe ngadto sa atleta atol sa opening ceremonies.

Matud pa ni barangay captain Quiño nga ang torneyo giumol aron dili modangop sa droga ang mga kabatan-onan, apan ang labing mahinungdanon mao ang kahiusahan alang sa malinawong barangay Basak.

Usa sa mga highlights sa opening ceremonies mao ang pagpili og "Miss Summer Sportsfest 2009" diin si Shiela Lyn Pareja sa LG Team maoy nidaog.

Ang iyang runners-up mao sila si Verna Marie Ochea sa LG Team (1st runner-up), Jean Ochea sa Tabok Team (2nd runner-up) ug Jasmine Ochea sa Tabok Team (3rd runner-up).

Natukod ang maong sportsfest pinaagi sa mga paningkamot sa Barangay Youth Development Council (MYDC) ubos sa liderato ni barangay captain Felijur Quiño ug sa Sangguniang Kabataan (SK) pinaagi sa ilang chairman Stefanie Joy Antone uban sa iyang mga konsehal nga naglangkob nilang Cathlyn Jane Quiño, Milkim Castro, Rechiel Lucero, Reila Tejero, Jolan Endrina, Ivan Laurito ug Merjorie Bitoon. –BANAT NEWS