Lambayan, Kinaadman gisubha'g daog
CEBU, Philippines - Gisubhan og daog sila si Francis Lambayan ug Joshua Kinaadman sa ilang unang duwa nga nakapahayag sa kampanya sa Sugbuanon sa 2009 Head Penn Age-Group Tennis Tournament kagahapon didto sa Praxivilla tennis courts sa Dumaguete City.
Miagi pa og makutas nga duwa sila Lambayan ug Kinaadman una nila mapukan ang tagsa-tagsa nila ka kaatbang sa ilang mga duwa sa boys 12-under.
Si Lambayan mirehistro og 6-2, 75 nga kadaugan batok ni Rommel Orbeta, samtang si Lambayan miposte og 6-1, 3-7, 10-7 nga kadaugan batok ni Van Abistado.
Hinuon, ang laing tulo ka Sugbuanon ubos sa Sancase Developmental Training Pool ni Fr. Rey Talaugon napukan sa ilang unang duwa. Sila mao si Derek Tabotabo, Jan Godfrey Seno ug Nino Mari Stefan Baylosis.
Sila si Seno ug Tabotabo nga pulos nasugamak sa 12-under class, nagtinguha nga mobangon sa unisex 10-under karong adlawa.
Miyukbo si Seno ngadto ni Carl Cathedral, 2-6, 6-4, 10-5, samtang si Tabotabo miluhod ngadto ni Ramil Jomalod sud gihapon sa tulo ka sets, 6-1, 7-6, 10-8.
Si Baylosis gisirohan ni Bruce Masquete sa boys 18-under division, 6-0, 6-0.
Sa laing bahin, ang managsuong Niño ug Sallymae Siso nakabaton og first round bye. – BANAT NEWS
- Latest
- Trending
