Ave Maria, Water Market naka-ikyas sa ilang kontra

CEBU, Philippines – Parehong niagi og kulba-hinam nga kadaugan ang Ave Maria ug ang Water Market sa nagpadayong Power Forty President’s Cup Summer League niadtong Martes didto sa Inayawan Sports Complex.

Ang Ave Maria diriyot madisgrasya dihang midaog lang kini og dos puntos batok sa Park ‘N Go Bakeshop sa iskor nga 68-66, samtang ang Water Market naka-ipsot batok sa www.fedguns.ph sa iskor nga 70-69. 

Naglabaw ang Water Marker, 54-30 pagsugod sa fourth quarter, apan gihinay-hinayan kini'g kitkit sa fedguns aron makasikit apan wala kini makalahutay sa ilang kumbati kay nahutdan na kini sa oras.

Sa laing bahin, ang Ave Maria, kinsa nag-una na karon sa liderato nga adunay 2-0 win-loss record gipangulohan ni Efren Mosqueda pinaagi sa iyang 16 puntos, gisundan ni Jun Felicitas nga adunay 14 puntos.

Si Arias, kinsa miposa og 20 puntos mao sab ang nangulo sa Park N' Go, kinsa miahon og 1-1 nga baraha.
Ang Water Market, kinsa nagbitbit sab og 1-1 nga baraha, gipangulohan ni Allan dela Rama sa iyang 12 puntos, samtang sila si Joey Escalon, Doydoy Abellana ug Mark Genzon mitampo og 10 puntos matag usa.

Ang fedguns gipangulohan ni Rady Abadejos sa iyang 14 puntos, gisundan nilang Nestor Javierto ug Rey Mabalcon nga pulos adunay 13 puntos.

Puntos Matag Usa

Unang duwa:

Ave Maria (68) - Mosqueda 16, Felicitas 14, Fuentes 12, Tabar 11, Abasolo 9, Romariz 5, Navares 1

Park ‘N Go (66) - Arias 20, Layon 12, Echavez 10, Lalican 9, Dejarme 5, Rama 4, Balbanera 2, Bacalso 2

Ikaduhang duwa:

Water Market (70) - Dela Rama 12, Escalon 10, Abellana 10, Genzon 10, Dumale 6, Dejacto 6, Yosores 5, Eleguin 4, Cayacap 4 Dacalos 3

www.fedguns.ph (69) - Abadejos 14, Javierto 13, Mabalcon 13, Rosal 10, Cabañero 9, Ibones 7, Yu 3 –BANAT NEWS