CEBU, Philippines - Nilampos ang defending champion M.Lhuillier Kwarta Padala-Cebu Niños sa ilang tinguha nga moabante pagbalik sa National Finals dihang ilang gitagak ang Trace-Laguna Stallions, 90-86 sa ilang semifinals series sa 2009 Smart Liga Pilipinas Conference II niadtong miaging gabii didto sa Stallions Gym, Laguna.
Ang Niños naghuwat nalang karon sa resulta sa away tali sa fourth-seed Quezon Red Oilers ni Gov.Raffy Nantes ug coach Oliver Bunyi kinsa naglabaw karon, 2-1, batok sa topseed Misamis Oriental Meteors sa kaugalingon nilang semifinals series.
Nahimong init ang sinukliay og puntos tali sa Niños ug sa Stallions sulod sa tulo ka kwarter, apan nipabaha og puntos ang Niños pag-abot sa final period aron itukod ang otso puntos nga labaw 78-70.
Wala magpaalkanse ang Stallions dihang nihimo sila og rally sa pagpangulo ni RB Mangahas, Ricky Ricafuerte ug Jerwin Gaco aron inaug ang labaw ngadto sa tres puntos, 80-83 sa nahibiling 1:22 sa duwa.
Tungod sa kalit nga rally sa Stallions, napugos si Niños coach Raul “Yayoy” Alcoseba sa pagtawag og time-out aron hapnigun ang ilang gameplan. Si Marlon Basco mipatusak sa iyang crucial nga tres a nahibiling 29 segundos aron ibalik sa Niños ang labaw, 86-83.
Ang upat ka free-throw nila ni Basco ug Woodrow Enriquez mao ang nikandado sa ilang kadaugan.
Unang nidaog ang Cebu sa game one batok sa Laguna, 79-72, ug giusban nila sa game two, 95-83. Si Bruce Dacia maoy top scorer alang sa Cebu Niños sa iyang 22 puntos, gisundan ni Enriquez nga midiga og 20 puntos, unom ka rebounds ug unom ka assist.
Sa laing bahin, si Mangahas miposte og 21 puntos aron pangulohan ang iyang koponan, samtang si Villaver ug Robert Sanz midunol og 13 puntos matag usa alang sa pilderong Laguna Stallions.
Puntos matag usa :
Cebu (90)— Dacia 22, Enriquez 20, Padilla 11, Basco 11, Santos 11, Ababon 6, Dizon 4, Cavan 2, Aying 2 , Tangkay 1.
Laguna (86)—Mangahas 21, Sanz 13, Villaver 13, Ricafuerte 10, Gaco 9, Ekwe 8, Estrada 6, Angeles 3, Doruelo 2, Swan 2.
Quarterscores: 22-21, 44-42, 67-64, 90-86. – BANAT NEWS