Shakey's V-League papalo na sa Abril 19

MANILA, Philippines - Magiging mainit ang aksiyon ngayong summer sa pagbubukas ng Shakey’s V-League, na nasa ikaanim na edisyon na, sa April 19 tampok ang walong pangunahing collegiate team sa bansa sa Fil-Oil Arena (dating The Arena) sa San Juan City.

Ang San Sebastian College, na umaasam ng kanilang ikalawang sunod na kampeonato, dating three-time champion University of Santo Tomas at dating titlist Adamson ay muling aasinta ng korona, habang nais naman wakasan ng Ateneo ang kanilang pagka-uhaw sa korona sa torneong hatid ng Shakey’s Pizza.

Pinalakas naman ng Far Eastern U, Lyceum at St. Benilde ang kanilang line-up upang magbigay ng hamon sa first conference crown habang umaasa naman ang University of the Philippines ng magandang karanasan sa kanilang unang pagsali sa liga na inorganisa ng Sports Vision.

Ang UP, ang ikalawang top team sa UAAP, ang papalit sa La Salle, dating three-time champion, na nagwithdraw muna sa summer league ma-tapos hindi makabuo ng isang malakas na koponan.

Ang Tigress at Lady Archers ay kapwa nag leave-of-absence sa first conference ng ikalimang season na pinagreynahan ng Lady Falcons ngunit kapwa bumalik sa liga noong nakaraang kumperensiya na pinagwagian ng Lady Stags.

Inaasahang magbibigay ng mabigat na hamon ang Lady Maroons sa pito pang kalaban upang magkaroon ng pag-asa sa karangalan sa pangunahing ladies volley league sa bansa.

Asahan ang mahigpit at kapana-panabik na laban sa bagong format ng torneo na single round robin elimination na ang apat na pangunahing team ang susulong sa quarterfinals, upang makasama nila ang dalawang provincial teams na Univ. of St. La Salle-Bacolod at Univ. of San Jose-Recoletos (Cebu).

Lahat ng walong koponan ay pinayagan ng may 14 na players sa kanilang lineup na ang 12 nito ay kailangang kasama sa lineup ng kani-lang school leagues. Lahat ng team ay may guest player para palakasin ang kanilang team at para sa pag-angat ng antas ng kompetisyon.

Para sa ilang detalye, bisitahin ang tournament website sa www.v-league.ph.