CEBU, Philippines - Gipahamtangan og laing kapildihan sa defending National Champion M. Lhuillier-Cebu Niños ang host Trace-Laguna Stallions, 95-83 aron pagposte og 2-0 nga bentaha sa ilang “best-of-five” semifinal series sa 2009 Smart Liga Pilipinas Conference II niadtong Biyernes sa gabii didto sa Trace College Gym sa Los Baños, Laguna.
Ang Cebu Niños pirmeng naggukod gikan sa pagsugod hangtod nga natapos ang ikatulong kuwarter, 60-64. Apan sa final quarter, ang Cebu Niños ni businessman-sportsman Michel Lhuillier ug coach Raul ‘Yayoy’ Alcoseba milusad og 21-8 nga rally sa pagpangulo nilang Marlon Basco, Stephen Padilla, Bruce Dacia ug Woodrow Enriquez aron pag-ilog sa labaw, 81-72 sa nahabiling 3:11 sa duwa.
Hinuon, ang Stallions ni Erwin Genuino ug coach Nomar Isla mitusik og balik aron pagkitkit sa labaw sa katapusang dos minutos, 78-83, human sa duha ka free throws ni Jerwin Gaco. Apan sila si Dacia ug Basco mihungit og siyete puntos aron pagposte og 12 puntos nga labaw, 90-78 sa nanghinapos nga bahin sa regulasyon.
Gumikan sa maong kadaugan, ang Cebu Niños nagkinahanglan na lang og usa ka daog aron mo-abante sa National Finals.
Ang Game-3 magpabilin gihapon didto sa korte sa Stallions, kinsa nagtinguha makabangon aron malamdagan pa ang ilang kampanya alang sa finals. Kun malugwayan ang serye, ang Games Four ug Five dad-on dinhi sa Sugbu.
Si Basco, kinsa maoy reigning Liga Pilipinas MVP mibahog og 26 puntos. Si Padilla mitimang og 20 puntos.
Ang nalukapa nga Stallions gipangulohan ni Gaco sa iyang 20, samtang si Samuel Ekwe miani og 17 puntos uban ang 11 ka rebounds.
Puntos Matag Usa
Cebu (95) - Basco 26, Padilla 20, Enriquez 17, Dacia 13, Santos 6, Ababon 4, Dizon 4, Tangkay 2, Mepana 2, Aying 1
Laguna (83) - Gaco 20, Ekwe 17, Bolocon 15, Ricafuente 13, Sanz 7, Villaver 6, Mangahas 3, Estrada 2. – BANAT NEWS