CEBU, Philippines - Paninguhaon karon sa CSD Builders mokulit og laing daog batok sa Ave Maria Sanctuary Park/USJ-R Team-B sa crossover semifinals sa Buanoy Invitational Open basketball tournament sa barangayBuanoy, Balamban, Cebu.
Ang Builders ni coach Boboy Cal mitapos sa elimination round isip no. 2 contender sunod sa topseed nga Ave Maria-Team A, kinsa makigsangka batok sa no. 4 seed Mandaue Cyclone ugmang adlawa sa laing crossover match.
Ang Builders midaog sa una nilang sangka batok sa Ave Maria bisan pa sa pagpanginit og maayo sa ilang rookie nga si Kurt Amores.
Ang Ave Maria-Team A gilangkuban sa mga kanhi Jaguars nga dili na makaduwa sa CESAFI nga naglakip nilang Armand Ponce, Ranulfo Malinao ug Jabe Delfino.
Ang Builders mosandig sa ilang mga beterano nga sama ni ex-CIT Wildcat Jerry Jaca, three-point artist Aldrin Ocañada, Jared Kane Abatayo, Jan Montalbo, Franklin Nailon, Danny
delos Santos, Roy Arnado, Michael Sereño ug Wilbert Sayson.
Ang modaog maoy mag-abot sa best-of-three finals nga sugdan karong Abril 13.
Ang kampiyon makadawat og P50,000 nga ganting salapi ug tropeyo, samtang ang second placer makaangkon og P30,000 ug ang third placer mobulsa og P10,000. – BANAT NEWS