CEBU, Philippines - Si Gary Cañeda maoy nanghawod sa first leg sa 2009 OZ Racing Grand Prix Series nga gipahigayon niadtong Domingo didto sa Parkmall parking lot sa Mandaue reclamation area.
Giladlad ni Cañeda ang iyang tinagoang abilidad aron angkonon ang premiere expert open title ug ingon man sa novice open category.
Si Andrei Ursal mipahiluna sa ikaduhang dapit sa expert open, samtang si Robbei Neil Enriquez mi-okupar sa ikatulo, gisundan nilang Samuel Bernardeno ug RJ Manlise alang sa ikaupat ug ikalima nga dapit.
Si Lyndon Requilme mao sab ang nanghawod sa mixed automatic. Gisundan nilang Insik Flores, Gilbert Miro, Keken Cabahug ug Andoy Sanchez nga miangkon sa ikaduha, ikatulo, ikaupat ug ikalima nga dapit.
Sa laing bahin, si Mario Borbon mirehistro og double championship ning maong kompetisyon nga gipaluyohan sa OZ Racing Corporation sa abag sa Yamaha Motors Philippines Inc. ug Norkis.
Si Borbon naghari sa beginners superstock 110 ug 125cc categories.
Si Keken Cabahug mipahiluna sa ikaduha sa beginners 110, samtang sila si Moises Muñoz, Nelson Mayol ug Jovenille Abellar maoy mikompleto sa top five performers.
Ang five-leg Underbone Motorcycle Racing nga gipasiugdahan sa OZ Racing dad-on didto sa Kartzone sa barangay Mabolo ug sa Danao City. Ang tukmang petsa ipahibalo sa dili madugay. – BANAT NEWS