Niños manulong karon sa Laguna

CEBU, Philippines - Sa labing unang higayon, ang defending National Champion M. Lhuillier-Cebu Niños dili magabaton og homecourt advantage sa playoffs gumikan kay sila man maoy manulong batok sa second seed Trace-Laguna Stallions sa ilang best-of-five semifinal series nga sugdan karong adlawa didto sa Trace College gym sa Los Baños, Laguna.

Ning tuiga, nag-abot na usa ka higayon ang Stallions ug ang Niños. Kini nahitabo didto sa Ilocos Sur leg niadtong Enero 29 diin ang Stallions nakaipsot sa iskor nga 63-61. Mao kadto ang labing unang daog sa Laguna batok sa Cebu kay gilabhan man sila sa naulahi sa duha nila ka engkuwentro sa miaging tuig sa wala pa serohi sa tulo ka duwa nila sa quarterfinals.

Hinuon angayan nga kalimtan sa Niños ang ilang kapildihan sa Stallions kay niadtong higayona si Bruce Dacia man lang ang nanginit nga mipupo og 24 puntos uban ang upat ka rebounds. Gawas niini, daghang palpak ang ilang free-throw shooting diin sila mipasud lang og 10 sa 18 ka tira. Wala sab sila kaugpo sa 3-point area diin lima lamang sa 22 nila ka itsa ang ilang nabugha. Lain pang mibuga og maayong duwa sa Stallions mao sila si Alex Angeles ug RB Mangahas.

Apan seguradong lahi na ang mahitabo karon gumikan na sab sa pag-retoke sa lineup sa duha ka kampo. Anaa na sa poder sa Niños silang Abby Santos ug Michael Dizon nga pulos maayo na'g performance sa miaging tulo ka duwa, samtang ang Stallions mipalig-on sa ilang puwersa pinaagi sa pagkuha ni Fil-Am pointguard Elijah Swan ug ingon man sa pag-reactivate ni Jerwin Jaco.

Sa gihapon, si Dacia maoy mangulo sa opensa sa Niños uban nilang MVP Marlon Basco, Woodraw Enriquez ug shooters Stephen Padilla ug Danny Aying. Lain pa nilang gisaligan mao sila si Gerry Cavan, Mark Ababon, Ariel Mepana, Rino Berame, Ron Capati ug Jercules Tangkay.

Ang Games 2 ug 3 adto gihapon duwaon sa teritoryo sa Stallions karong Biyernes ug Sabado. Gumikan niini, si Niños coach Raul 'Yayoy' Alcoseba manghinaut nga makatusik bisa'g usa lang ka daog didto sa Laguna aron ilang mailog ang homecourt advantage.

Kun ugaling adunay Game-4 ug Game-5, banatan kini karong Abril 6 ug 7 diha sa Cebu Coliseum. – BANAT NEWS