Mayor Edsel Galeos Cup 2009 gikatakda sa Abril 18

CEBU, Philippines - Ang Argao Sports Commission uban sa Association of Barangay Council (ABC) nga gipangulohan ni barangay captain Virgilio Rizon mopahigayon og summer basketball tournament nga ulohan og “Mayor Edsel Galeos Cup 2009” karong Abril 18 didto sa bag-o lang nahuman nga Diosdado Macapagal Sports and Cultural Center sa nahisgutang lungsod.

Adunay 19 ka teams ang mipadayag sa ilang pagsalmot   diin 12 niini ang moduwa sa Inter-Barangay category. Ang nahabiling pito ka teams moduwa alang sa Inter-Town division uban sa Argao nga moduwa isip guest team.
Ang mga teams nga ubos sa Inter-Barangay tournament bahinon sa duha ka brackets.

Si Governor Gwen F. Garcia maoy pinasidunggang dinapit ug mamumulong atol sa opening ceremony.

Molamas sa maong kalihukan mao ang pagpili og best muse ug best in uniform.

Ang Inter-Town category gipaluyohan sab sa mga mayor gikan sa lungsod sa Sibonga hangtod sa Santander. Ang Inter-Barangay category gipaluyohan sa tanang mga barangay kapitan ubos ni ABC president Rizon. – BANAT NEWS