Hotel Fortuna/SWU kampiyon na
CEBU, Philippines - Hapit mabulilyaso ang Hotel Fortuna/SWU Cobras dihang nahilis ang ilang 19 puntos nga labaw sa katapusang kuwarter, apan sila si Chris Litorja, Eliud Poligrates ug Alfred Belande naghugpong sa pagpabangon sa ilang koponan aron pagposte og 88-71 nga kadaugan batok sa Enervon-C/UC Webmasters sa Game-4 ug ingon man paglangkat sa kampiyonato sa 3rd CESAFI Partner’s Cup niadtong Martes gabii sa Cebu Coliseum.
Ang Cobras, kinsa mibulsa og P30,000, pormal nga mitak-op sa "best-of-five" series, 3-1.
Ganado kaayo ang Cobras nga tukbon na ang korona dihang miratsada dayon kini aron paglansang og 24-5 nga bentaha nga mao usab ang nakapaluya sa naghangak nga Webmasters.
Ang fighters nga Webmasters mipakita pa'g gamay nga kahayag nga makabawi sa maong alkansi, apan nahutdan na sila'g panahon.
Gikan 19 puntos nga lubong, 53-72, ang Webmasters milusad og 10-0 nga rally ug gisundan og 18-2 run aron pagkitkit sa labaw, 68-74, human sa tres ni Moncrief Rogado sa katapusang 2:50 sa duwa.
Apan didto ra kutob ang suwerte sa Webmasters, kay si Poligrates mirakrak og makabungog nga 3-point shot uban sa abag ni Litorja, kinsa milansang og sunod-sunod nga singko puntos.
Ang 6-foot-9 center nga si June Mar Fajardo sa Webmasters maoy napiling Most Energetic Player sa liga nga nitali og 25 puntos.
Si Belande midiga og 25 puntos alang sa Cobras, samtang si Eric Zanoria miamot og 15 puntos.
Puntos Matag Usa
Hotel Fortuna/SWU (88) - Belande 25,Zanoria 15, Poligrates 12, Jalandoni 10, Diango 9, Litorja 7, Pacquiao 4, Divinagracia 2, Nuñez 2
Enervon-C/UC (71) - Fajardo 25, Rogado 18, Abella 10, Luceño 6, Pao 4, Babad 4, Ramos 4. – BANAT NEWS
- Latest
- Trending
