Cebu Niños nakabaton homecourt advantage

CEBU, Philippines – Sa labing unang higayon sud sa duha ka conferences, ang defending National Champion M. Lhuillier-Cebu Niños misulod na sab sa playoff series nga magbaton og homecourt advantage dihang ilang harungon ang second seed Trace-Laguna Stallions sugod karong Huwebes didto sa  Trace College Gym sa Los Baños, Laguna.

Mitapos sa ikatulong dapit nga adunay 41 puntos, ang Cebu Niños ni sports patron/businessman Michel Lhuillier ug multi-titled coach Raul ‘Yayoy’ Alcoseba mipusoy sa sixth seed Ilocos Sur Bravehearts sa opening round, 3-0.

Ang Cebu Niños ug Stallions mag-abot na sab ning maong conference nga gipaluyohan sa Smart, ML Kwarta Padala, Air21, Accel, Burlington, Laptop Phoneshop, Exchange, Nature’s Spring Water ug Molten ubos sa pagtugot sa Samahang Basketbol ng Pilipinas (SBP).

Katapusang nag-abot ang duha atol sa Ilocos Sur Leg niadtong Enero 29 diin ang Stallions nakalingkawas sa mainitong duwa sa iskor nga 63-61.

Mao kadto ang labing unang higayon nga ang Stallions ni Erwin Genuino ug coach Nomar Islad mipukan sa Cebu Niños.

Niadtong miaging conference, ang Cebu Niños nidominar sa Stallions pinaagi sa pagdaog sa ilang mga duwa sa Pagadian (105-68) ug Cebu City (88-81) atol sa Tour Phase. Ang Cebu Niños mipalayas sab sa Stallions sa ilang “best-of-five” quarterfinals, 3-0 (91-85, 99-73 ug 82-71). –BANAT NEWS