Tubid, naasahan nang kailangan
MANILA, Philippines - Tunay na maaasahan ng Barangay Ginebra si Ronald Tubid lalo na sa oras ng pangangailangan.
Muli itong pinatunayan ng 6-foot-1 guard nang dalhin ang Kings sa pinaka-importanteng panalo laban sa Barako Bull, 111-103, sa PBA Fiesta Conference na ginanap sa Panabo Cultural and Sports Center sa Davao.
Nagtala si Tubid ng career-high 29 puntos, kapantay ng produksiyon ng import na si Rod Nealy.
Naramdaman rin ang puwersa ni Tubid sa iba pang departamento nang kumana ito ng apat na rebound, dalawang steal at isang assist habang naging matatag na sandalan ito ng Kings para pigilan ang matinik na Barako Bull import na si Scooter McFadgon.
Nalimitahan ni Tubid si McFadgon sa 19 puntos na lubos na malayo sa nakagawiang 35 puntos kada laro.
“He gave us a lift, making big spot up shots, defending the best he can and making the right decisions,” ani Ginebra coach Jong Uichico.
Sa naturang panalo, naglista si Tubid ng 7-of-14 sa 3-point area kung saan ibinato nito ang kaniyang huling tres may isang minuto na lamang ang nalalabi tungo sa 104-95 bentahe ng Ginebra. (Chris Co)
- Latest
- Trending
