CEBU, Philippines - Ang Ave Maria/USJ-R Jaguars makigsangka batok sa Salazar Institute of Technology (SIT) Skyblazers sa opening match sa Rudy Espinosa Cup 2009 nga gikatakdang sugdan karong Abril 13 diha sa Barba Sports Complex sa Toledo City.
Adunay kinatibuk-ang P150,000 ang gigahin alang sa nag-unang tulo ka mga mananaog sa maong torneyo nga pagasalmotan og walo ka teams nga usa sa mga highlights sa tinuig nga kapistahan sa mahal nga patron sa Toledo — San Juan de Sahagun karong Hulyo 11-12.
Ang mga detalye sa maong torneyo giyagyag atol sa luncheon meeting nga gipasiugdahan ni kanhi Baby Lancer Ernie Lauranilla niadtong Martes didto sa Baseline Restaurant.
Mitambong sab sa maong tigum si Toledo City Sports Committee Chairman ug city councilor Jun Borja. Lain pang mitambong mao si coach Bong Begontes sa SWU, Ruel Sestoso sa Roble Shipping, Esteban Cesar Ortega sa AC Sports, Raffy Senining sa Ave Maria, coach Tata Merced sa ACT ug sila si Romy Cal ug Kokoy Cal sa CSD.
Ang walo ka teams nga mopakita'g aksiyon mao ang University of San Jose-Recoletos, SCSIT, Best Buy ug Asian College of Technology (ACT) Cyber Knights nga nag-uban sa Group-B ug Southwestern University, CSD Builders, Roble Shipping ug AC
Sports nga nagtapok sa Group-A.
Ang CSD Builders ni coach Romy Cal ug assistant coach Kokoy Cal mosugod sa ilang kampanya batok sa Roble Shipping karong Abril 15.
Ang kampiyon makaangkon og P70,000, ang second placer makadawat og P50,000 ug ang third placer makaangkon og P30,000. - Gabby G. Malagar (BANAT NEWS)