Jazz midaug batok Suns sa OT

CEBU, Philippines - Human ma-apas ang ilang 21 puntos nga labaw, nagkinahanglan pang mohimo’g dakung rally ang Utah Jazz batok sa Phoenix Suns aron ihatod ang duwa ngadto sa overtime ug aron pagkulit og 104-99 nga kadaugan kagahapon sa nagpadayong aksiyon sa National Basketball Association (NBA) didto sa EnergySolutions Arena sa Salt Lake City, Utah.

Nagkabuang og pananagang ang Jazz dihang gi-apas sa Suns ang labaw sa Jazz ug sa kinatumyan, ang Jazz na usab maoy mi-rally aron paghatod sa duwa ngadto sa overtime.

“We put ourselves in a bad position in the second half. We really came out poorly,” matud pa sa guard sa Jazz nga si Deron Williams kinsa mi-iskor og siete puntos sa overtime period ug mihakot og 21 puntos lakip ang 13 ka assists.

Apan si Mehmet Okur maoy nangu sa opensa sa Jazz sa iyang 26 puntos ug 11 ka rebounds.

Ang Jazz nga aduna nay 45-27 nga baraha, midaug na og sagunson 14 ka duwa sa Salt Lake City. Ang Suns nga gipangulohan nilang Steve Nash ug Grant Hill sa ilang 20 ug 19 puntos, aduna nay 40-33 nga baraha.

Si Shaquille O’Neal kinsa igo lang naka-iskor og dos puntos sa first half, midugang og 16 puntos alang sa Suns lakip ang 10 ka rebounds.

Sa laing duwa, gilubong sa Miami Heat ang Milwaukee Bucks, 102-85, gi-ihaw sa Portland Trail Blazers ang Memphis Grizzlies, 86-66, gikulata sab sa Denver Nuggets ang Golden State warriors, midaug ang Houston Rockets batok sa Los Angeles Clippers, 110-93, midaug ang Charlotte Bobcats batok sa New York Knicks, 96-85, gisungay sa Chicago Bulls ang Indiana Pacers, 112-106 ug naka-ispot ang Detroit Pistons batok sa Washington Wizards bisan pa sa pabalik ni Gilbert Arenas, 98-96.  - Gabby G. Malagar (BANAT NEWS)