Cebu nangharos sa ABAP tourney

CEBU, Philippines - Wala magpapugong sa ilang tinguha nga mailhan isip numero uno sa natad sa boksing sa tibuok Visayas ang Team Cebu City dihang ilang gilangkat ang labing unang korona sa Smart/ABAP Visayas Area Amateur Boxing Championship niadtong miaging adlaw didto sa Ormoc City.

Ang Cebu City nga gilangkuban sa 17 ka amateur boxers midaog og upat sa unom ka division sa maong torneyo.

Ang pambato sa Cebu sa Kids 31 kgs. class nga si Margarito Moya mao ang unang mikulit og daog dihang iyang gipilde si Charlie Panes sa Bago City, 9-8.

Misunod sab dayon ang pagmangtas sa 13-anyos nga si Jack Tepora ug midaog kini pinaagi sa desisyon batok ni Alvin Sibuga sa Bacolod City ubos sa 40 kgs. class. 

Milampos sab sa iyang kampaniya sa School Boys Division si Danlou Codilla dihang iyang gikulata si Sonny Boy Abella sa San Carlos City, 11-4. 

Nanghawod sab ang laing duha ka Sugbuanong boksidor sa Juniors Division. Sila si Jahlee Payao ug Edu Serrano gikoronahan isip kampiyon human nila gipilde ang ilang tagsa-tagsa ka kaatbang. Si Payao mipukan ni Jhonriel Muagro sa Bohol, samtang si Serrano midaog sab batok ni Allan Refuela.

Sa Youth Boys Division, nakaipsot usab si Adrino Pescante sa Cebu dihang nidaog siya og usa lang ka punto batok ni Martin Cordova sa Bago City, 17-16. Si Anthony Sabalde mi-iskor sab og 23-16 nga kadaugan batok ni Geldon Cordova sa Bago City ug si Julito Tuastumban misakmit sab sa bulawang medalya dihang iyang gipaundang si Timoteo Altubar, kinsa sakop sab sa Team Cebu.

Mipahiluna sa ikaduha nga dapit mao ang Bago City bitbit ang tulo ka bulawan ug ang ikatulo mao ang Bacolod City.

Ang 1st Smart/ABAP Visayas Area Boxing Championship gipasiugdahan sa (ABAP) Amateur Boxing Association of the Philippines sa pagpangulo ni chairman Manny V. Pangilinan ug sa presidente niining si Ricky Vargas. – BANAT NEWS