Night Supercross subhan karon

CEBU, Philippines - Subhan na ang labing unang night supercross sa kasaysayan sa motocross racing sa Kabisay-an ug Mindanao pinaagi sa third leg sa 3rd MS Motosuit Motocross Series sugod karong adlawa diha sa lungsod sa Consolacion.

Ang duha ka adlaw nga kompetisyon sugdan pinaagi sa inato lang nga opening ceremony sa alas-6 sa gabii diha sa Government Center sa Cansaga Bay, Consolacion.

Naglakip usab kini sa presentasyon sa 2008 MS Motosuit Motocross Series ug firework display nga maoy motimaan sa pagsugod sa kompetisyon.

Ang Night Supercross Challenge pagasalmotan sa mga bantugang riders lukop nasud nga gipangulohan ni 11-time National Champion ug 2003 FIM Asian champion Glenn Aguilar, kinsa maoy image model sa MS Motosuit.

Matud pa ni sportsman ug MS Motosuit big boss Lou Ornopia nga ang maong kalihukan lahi sa regular motocross tungod kay himuon man kini panahon sa gabii.

Dugang sugang dagitabnon ang gipamontar sa racetrack sa tabang ni Teddy Uy, usa ka professional photographer kinsa usa nga desinyo sa sistema sa panuga aron pagseguro nga balanse ang hayag sa racetrack ug walay anino nga makabalda sa mga riders.

"Si Mr. Teddy Uy maoy nagpahulam nako sa dagkong mga suga ug sa higanting generator, mitabang sab siya nako sa pagpahiluna pagsiguro nga hayag ug way anino sud sa race track. Bisan sa kagamay sa panahon sa pagpangandam sa Night Supercross doble karon ang among paningkamot nga magmalampuson ang duha ka adlaw nga event," matud pa ni Ornopia.

Ang first heat tigian karong adlawa, samtang ang second heat himuon ugma ug ingon man ang awarding sa top performers sa nagkalain-laing mga kategoriya.

"Daku kaayo ni nga event sa motocross racing dinhi sa Visayas ug Mindanao. Isip usa ka event organizer sa motocross, among dakung damgo nga makapahigayon gyud og lumba panahon sa kagabhion. Karon mahitabo na gyud ang maong pangandoy ug nagpasalamat ko sa mga riders ug sa mga sponsors nga way lubad nga nagsuporta sa MS Motosuit Motocross Series," sumala pa ni Ornopia.

Ang maong kalihukan gipasiugdahan sa lungsod sa Consolacion ubos sa liderato ni Mayor Avelino Gungob Sr. ug ni councilor Arnulfo 'Taboy' Abinales uban sa pakigtambayayong sa Kier Louie’s Motosuit Manufacturing, Cebu Reliance Motor Parts, Castrol Power 1, Keiz BJ Motor Sales and Services, RMO Motor Parts, MS Digital Prints, Fork Oil Gaib USA, MS Unlimited ug MS Farms.

Sa laing bahin, ang Night Supercross Challenge ug ubang mga lumba nga gipaluyohan sa MS Motosuit makita sa CCTN Channel 47 matag Domingo gikan sa alas-9 hangtod sa alas-9:30 sa gabii. – BANAT NEWS